Party dang MLA-te sorkarin thawhpui ṭul a la ti lo cheu hi a vanduaithlak - ZPM

ZPM party chuan thuchhuah siamin, Covid-19 hripuiin nasa taka Mizoram a tihbuai tawh hnuah pawh sorkarin party dang MLA-te thawhpui ṭul a la ti lo cheu chu vanduaithlak an tih thu an tarlang a; sâwt zawka hripui do a nih theih nan hma la tur leh a loa awm theihna thila sum hman chawlhsan rih turin Mizoram sorkar an ngen.

ZPM chuan, hripui donaa thawktute'n theihtawp an chhuah chung pawha thi an awm ta zel chu inenkawlna hmunhma neih ṭhat tâwk loh vang, hmanrua leh damdawi changtlun tâwk loh vang leh hri veite hmuh chhuah tlai vanga a hun taka enkawl hman loh vangte nia an lan thu an tarlang a; hripui vei hmuh chhuah a pun zel chhan chu a veite dap chhuah hna chawlhsan vang leh lockdown hnuaia SOP kenkawh dan dik tâwk loh vangte nia a lan thu an sawi bawk.

Sâwt zawka hripui do thei turin inenkawlna hmunhma siam belh tur te, bungraw mamawhte neih belh tur leh thawktu lâk belh thuai turin ZPM chuan sorkar an ngen a, "Hripui dona atan sum a awm lo a nih chuan, a loa kan awm theih thil, sum hmanna dangte hi chu chawlhsan rih ngam turin sorkar kan ngen nawn leh a ni," an ti.

ZPM party chuan, "Heti khawpa ram pum kan buai tawh hnuah pawh sorkarin party dang MLA-te thawhpui ṭul a la ti lo cheu a, legislature party joint meeting emaw, all party meeting emaw a la ko thei tlat lo hi a vanduaithlak hle," an ti a; hripui kaihhnawiha sorkar laipui aṭanga sum tam tak rawn kal te, kohhran, páwl leh mi tlawmngaite'n sum an thawh khawmte chu hman ṭangkai dan rêlho a, pheikhai rual zawka thawhhona a awm theih an beisei thu an sawi.

Hripui laka invenna hlâwk ber chu a tam thei ang ber vaccine pek a ni tih chu khawvel pawm dan a nih thu sawiin ZPM chuan, "Mizorama vaccine pêk a chak tâwk theih loh chhan hi damdawi awm loh vang ni loin, thawktu indaih loh vang niin a lang," an ti a; Health department-ah post ruak hnawhkhah loh tam tak awm chu hnawhkhat a, chak zawka vaccine pek kalpui a ṭula an hriat thu an tarlang.

ZPM chuan, hripui darh zel tur vênnaa thawktu task force te, Health department mite leh anmahni puitute chu fakawm an tih tak zet thu an tarlang bawk.