Thilpek chungchanga HFW Secretary ngenna

Health & Family Welfare (HFW) secretary R Lalramnghaka chuan thuchhuah siamin, Covid-19 hripui dona atan HFW department-in ṭanpuina hmanraw hrang hrang a dawn ṭhinte chu sorkarin lawmawm a tih thu leh mumal taka chhinchhiah a ngaih thu a tarlang.

Health Secretary chuan, mimal leh páwlte'n HFW department hman tur ṭanpuina chi hrang hrang an pek ṭhin thu tarlangin, "A lawmawm hle. Ṭanpuina thilpek hlu takte hi mumal taka record vawn leh sem zâi a nih theih nan a remchan phawt chuan, thilpek petute’n HFW Secretary leh Principal Director-te hriattir zel tur a ni a, thilpek dawngtu tur office-te’n a petu turte lo bengvàr zel tur a ni," a ti.

Health Secretary/Principal Director hnena hriattir chu thilpek petu tan a remchan loh theih thu tarlangin Lalramnghaka chuan, "Thilpek dawngtu medical college/hospital hotute'n thilpek dawn chungchang hi a hma thei angin HFW Secretary leh Principal Director-te hnenah report vat tur a ni a. Motor/ambulance phei chu a dawng tur leh register tura GAD-ah phalna lâk a ngaih avangin document kimchang nen rang taka report thehluh zel tur a ni," a ti bawk.