Task force leh volunteer-te fak

ZPM Ṭhalai chuan thuchhuah siamin, Covid-19 donaa hlawh nei loa a taka thawktu local/village task force-te leh medical volunteer-te fakawm an tih thu an tarlang.

Hripui lèn ṭan tirh aṭanga tun thlenga task force-te leh medical volunteer-te hnathawh chu ropui an tih thu sawiin ZPM Ṭhalai chuan, "Anni hi a tìr aṭanga hri do kawnga a taka pên chhuak niin, task force-te phei chu nunna hial pawh lo hlàn hmasatu an ni. An inpekna avangin chhiatna rapthlak lehzual leh mualphona tam tak pumpelhin a awm fo niin a lang," an ti.

ZPM ṭhalaite chuan, kawng hrang hranga medical volunteer-te chhuanawm an tih thu sawiin, "An nunna thàpa hun khirh tak kara an thiamna leh theihnate ram tana an hlàn ngam hi a ropui kan ti. An inpekna hi kan theihnghilh tawh ngai lo ang," an ti bawk.