Covid-19 vanga thi zangnadawmna pe

November 23, 2020-a Covid-19 vanga thi R Hrangthanga, Thenzawl chu Bihar sorkarin a rál a, a nupui Lalawmpuii hnenah Bihar Election department chuan zangnadawmna cheng nuai 30 a pe. Hrangthanga hi Bihar inthlana Mizoram aṭanga IR police duty zinga mi a ni.

Bihar Joint Chief Electoral Officer (Joint CEO) chuan tun hnai khan Mizoram Joint CEO hnenah lehkha thawnin, R Hrangthanga nupui hnenah zangnadawmna cheng nuai 30 pek a nih thu a rawn hriattir.

Election Commission of India chuan inthlana duty avanga Covid-19 vei, thih phah chhungte chu cheng nuai 30 zel zangnadawmna pek tur tiin thutlukna a lo siam tawh a ni.

R Hrangthanga leh inthlana a duty-puite chu November 12, 2020-ah Mizoramah an rawn thleng a, swab sample endik nghal niin, Covid-19 positive a ni tih hmuh chhuah a ni. Serchhip CCC-ah dah nghal niin, November 22-a RAT hmanga a sample endikah a negative avangin chhuahtir nghal a ni a; CCC aṭanga a chhuah tûk November 23 chawhma dar 11:05-ah PTS, Thenzawla a inkhung hrannaah a thi a ni.

A thih avangin TrueNAT-PCR hmangin a sample endik leh niin, a positive tih hmuh chhuah a ni a; a thih aṭanga ni 30-na, December 23, 2020-ah Covid-19 vanga thi a nih thu Mizoram sorkarin a puang.