YMA din champha vawi 86-na : A remchan anga hman a ni

Nimin kha YMA din champha vawi 86-na a ni a, Covid-19 lêng mek avangin lawm theih ni lo mah se, YMA branch eng emaw zatin YMA Day pualin hun an hmang.

Hripui léng ziaawmna hmunah chuan YMA Day pual hian branch ṭhenkhatte'n thing phun hnatlang, YMA hmun sâm fai, mi in saksak, thlànmual sâm leh infuih tharna leh zirlai hlawhtling tharte chawimawina hun an buatsaih a, YMA kumpuan 'Zirna Uar' tih thupuia hmanga hun hmang pawh an awm.

YMA branch tam tak chuan YMA thupui, 'Ṭanpui ngaite ṭanpui' a nih angin home hrang hrangah ṭanpuina an pe a; branch huam chhunga khawsak harsa zawk chhungkaw tam tak hnena chhawmdawlna pe branch ṭhahnem tak an awm bawk.

YMA Day pual hian hriat theih chinah nimin leh Thawhṭanni khan YMA branch paliin thisen an pe. Nimin khan Siaha Joint YMA chuan District Hospital tan thisen unit 37 an pe a, petute mipa 35 leh hmeichhia pahnih niin, RAT negative-te chauh thisen pektir an ni.

Champhai Vengthar Branch YMA chuan YMA Day pual bakah, an din champha vawi 25-na pualin an venga community hall-ah thisen pek rûnpui an huaihawt a; mipa 25 leh hmeichhia pakhatin District Hospital tan thisen an pe. Serkawn Branch YMA pawhin YMA Day pualin thisen unit 22 an pe bawk.

Aizawl khawpuiah chuan YMA branch tam takin an huam chhunga kawngpui dungah YMA flag an tár a ni.

Tarlan tawh angin Central YMA president Vanlalruata chuan YMA Day pual hian thuchah siamin, YMA thupui 'Ṭanpui ngaite ṭanpui' a nih angin, mi dangte ṭanpui kawnga theihtawp chhuaha pên chhuak turin YMA hruaitute a sawm a ni.