Ráltlânte chhawmdawlna pe turin CYMA-in Chief Minister an ngen

Central YMA hruaitute chuan nimin khan an president Vanlalruata hoin chief minister Zoramthanga a pisaah an kâwm a; Myanmar tualchhung buaina avanga Zo hnahthlak, Mizorama ráltlânte chu chhawmdawlna pe turin an ngen.

CYMA hruaitute chuan, sipai rorelna duh loh avanga Mizorama rawn ráltlân mekte chhawmdawl an ṭul thu leh hmalak thuai a ṭul thu Chief Minister an hrilh a ni.

Hemi chungchangah hian CM Zoramthanga chuan, Myanmar ráltlânte chhawmdâwl chungchang an bawhzui mek thu sawiin, sorkar laipuia Ministry of External Affairs (MEA) lamah theihtawp chhuaha bawhzui a nih thu CYMA hruaitute a hrilh.

Central YMA hruaitute hnen aṭanga thu dawn danin, Myanmar ráltlânte chhawmdawlna pek a nih theihna atan Delhi-ah State Planning Board Vice Chairman hoin sorkar hotute'n MEA an dàwr mek thu Chief Minister-in a sawi a ni.

Inkawmnaah hian CYMA hruaitute chuan, Mizoram leh Assam ramri buaia hmalak dan an zâwt nghal a; Chief Minister chuan hmalak mek dante a hrilhfiah.

Ruihhlo do kawnga sorkar leh YMA thawhhona chungchang pawh sawiho a ni a; CM Zoramthanga chuan, thawhhona ṭha tak neih a, chak zawka hmalak ṭha a tih thu leh Covid-19 léngin ziaawm lam a pan hunah committee pui dina theihtawpa hmalak ṭha a tih thu a sawi a ni.