Health Minister-in tuar hrâm hrâm turin mipuite a ngen

Health & Family Wel­fare minister Dr R Lal­thangliana chuan, Mizo­rama Covid-19 darh zau tur vênna atana inkhàrkhipna kalpui mek pawhsei a nih chungchangah thuchah a tichhuak a; chhel taka tuar hrâm hrâm turin mipui a ngen.

Dr R Lalthangliana chuan, Covid-19 vangin thla hnih chhung inkhàr­khip a nih tawh thu sawiin, "A hrehawmin kan mangang tláng tawh hle ang tih a rinawm. Nunna chhanhim hi kan ngaihpawimawh ber a ni lo thei si lo. Lockdown hi kan tlin reng dawn lo a, kan inkhuahkhirh chhung hian chhel taka tuar hram hramin, fimkhur taka khawsa turin i insangmar thar leh ang u," a ti a; Covid-19 laka invênna tura inkaihhruainate ṭha taka zâwm turin a chah.

Intlawhpawh rih loh a ngaih thu sawiin Minister chuan, "Dawr hmun leh punkhawm theihna hmun, sa leh chawhmeh dang leh mamawh leinaah tih tak zeta fimkhurin, zûk leh hmuam inṭheh leh chawhmeh insuah thleng insúm rih ang u. Thil inban ṭâwm leh mi khawih hnu khawihna aṭang te, khuh leh ṭawng per aṭangtein awlsam taka kài theih a ni," a ti.

Health Minister chuan, "Hripui laka himna tura kan tih tur kan hre tláng vek tawh a, mi zawng zawngin mawhphurhna kan nei a ni. Rei lo tê kan ṭan tlàna chhel taka kan tawrh hram hram hian rei tak kan hlâwkpui dawn zawk a ni," a ti a; theih­tawp chhuah zel turin mi tin a ngen a ni.