KHAWTHLIR

Thisen pe
Champhai Bethel Venga Chhura Hmun Welfare chuan World Blood Donor Day pualin June 14, Thawhṭanni khan District Hospital blood bank-ah thisen unit 17 an pe. Chhura Hmun Welfare hian thisen pek rûnpui an huaihawt vawi riatna a ni.

Containment zone
Armed Veng leh Armed Veng South-a Covid-19 vei tam zualna hmunte chu Aizawl DC Dr Lalhriatzuali Ralte chuan containment zone-ah a puang thar a; Phunchawng hmun ṭhenkhat pawh micro-contaiment zone-ah a puang bawk. Hetih lai hian, Chhinga Veng, Tanhril Vengthar leh Muanna Veng hmun ṭhenkhat, containment zone-a puan tawh chu hlih a ni. Bawngkawna hmun ṭhenkhat, containment zone-a puan mek, hlih a ni tawh anga tarlan chu tihsual a ni a, containment zone a la nih mek thu dawn a ni.

Thing tiak phun
Kolasib DC Dr H Lalthlangliana leh YMA Sub-Headquarters, Kolasib hruaitute chuan YMA Day pualin nimin khan Bairabi, Phaisen, Vairengte, Saihapui-V, Pangbalkawn, Meidum, Saihapui-K, Buhchangphai leh Phainuam khuate an tlawh a, thing ṭiak eng emaw zat an phun. Khaw hrang hrangah hian VTF-te nen inkâwmin, ramri humhimna kawnga hmalakna sawt zawk kalpui a nih theih nan hmalakna daih rei tur ngaituah a ṭul thu sawiin, "Ngaihtuah thui lo tak chunga hmalakna chuan buaina bak a chawk chhuak ngai lo," a ti.

SRH-ah mi 12-in Ventilator hmang
State Referral Hospital (ZMC)-ah Covid-19 vei mi 211 enkawl mek an ni a, chu'ng zinga 29 chu ICU-ah enkawl niin, ventilator hmantir mek mi 12 an awm. SRH-ZMC Bulletin tarlan danin, hripui vei SRH-a enkawl mek zinga mi 182 chu ward hrang hrangah an awm a, chu'ng zinga mi 82 chu oxygen pek mek an ni. Nimin khan hripui vei mi 12 dah luh an ni a, mi 13 chhuahtir an ni thung.