Saron Venga sample random test-ah Hripui vei mi 44 hmuh chhuah a ni

YMA Day pualin nimin khan Saron Veng, Aizawla containment area huam chhunga chengte tan Covid-19 swab sample endik rûnpui (random test) neih a ni a, hripui vei mi 44 hmuh chhuah a ni.

Sample random test hi bialtu MLA Robert Romawia Royte hmalaknaa neih niin, endikna sensote a tum a; BN Hospital, Kulikawnin RAT hmangin endikna an kalpui a, Saron Veng LTF-te'n an pui bawk. Tlai dar 5:50-ah an zo thei a, mi 419-te sample laka endik niin, chu'ng zinga mi 44 chu Covid-19 positive an ni tih hmuh chhuah a ni.

Saron Veng LTF chairman Chuauhluna chuan, random test tihna tura a bul tumtu bialtu MLA leh RAT tihsaktute chungah an lawm thu a sawi a; an veng chu sorkarin a ngaihsak hle tih sawiin, sorkar chungah leh thilpek petu zawng zawng chungah an lawm tak zet tih a sawi bawk.

Random test ṭanna hunah Robert Romawia chuan, Health Minister leh Health department-te pawhin endik rûnpui neih ṭha an tih thu sawiin, "Saron Venga endik rûnpui hi a hlawhtlin dan azirin Aizawl East-II biala veng danga containment zone-ahte pawh chhunzawm a ni ang. Covid-19 donaa Mizoram sorkar hmalakna leh a insènso dan te, a chêt ṭhat leh ṭhat loh hre tur chuan state dangte'n Covid-19 veite an enkawl dan leh inenkawlna atana an sorkar insen dan zir chianin a hriat a ni," a ti.

Sorkar laipuia Urban Ministry-in Mizoram sorkar hnenah oxygen plant lian chi 13 pek a tum thu sawiin Robert Romawia chuan, "Kan rawt angin DRDO kaltlangin oxygen plant lian chi 13 min pek an tum a, Aizawl district-ah pathum leh district khawpui dang 10-ahte DRDO-in a rawn bun thuai dawn niin Urban Ministry-a Director-in a sawi," a ti a; approved list an rawn thawn thu a sawi.

Robert Romawia Royte chuan, Tata Trusts aṭanga tun hnaia oxygen concentrator 11 leh hmanraw dang dawn tharte chu mamawh zualna hmuna sem chhuah turin enfel mek a nih thu a sawi bawk.