Covid-19 léng thawh hnihnaah Migrant worker 46 an inhriattir
Covid-19 léng thawh hnihnaah state páwna hna thawk, hripui vanga an hna thawk chhunzawm thei lo (migrant worker) Mizoram Youth Commission (MYC)-a inhriattir tawh nimin thleng khan mi 46 an awm.
MYC chuan May 7, 2021 khan thuchhuah siamin, India ramah Covid-19 léng thawh hnihnain nasa taka ram a nghawng mek thu an tarlang a; state hrang hranga Mizoram mi hna thawka awm, hripui léng vanga Mizorama hawte chhinchhiah leh mimal taka hriat chian a nih theih nan ruahmanna an siam a ni.
Migrant worker MYC-a inhriattir tawhte chu Pune, Mumbai, Goa, Bangalore, Kolkata leh Chennai-a awmte an ni ber a, hotel leh spa-a thawk an ni tlangpui.
Nikuma Covid-19 a lèn lai khan MYC-ah migrant worker 2,637 an inhriattir a, North Eastern Council aṭanga sum hmuh hmangin mi eng emaw zat chu training chi hrang hrang neihpui an ni. Tun ṭuma migrant worker inhriattirte tan training buatsaih a nih dawn leh dawn lohah erawh thutlukna siam a la ni lo.