Minister hmalaknaa random test Sorkar mawng hlìmna a ni - BJP

BJP, Mizoram Pradesh chuan thuchhuah siamin, minister of state Robert Romawia Royte-in a bial chhunga swab sample random test a tihtir chuan Mizoram sorkar leh Health depart-ment chak lohzia a entira an ngaih thu an tarlang.

Mizoram BJP chuan, minister Robert Romawia hmalaknaa Saron Venga sample random test neih a nih avangin an lawmpui thu an sawi rualin, "Mizoram sorkar Health department lam chak lohzia leh nêpzia a tilang chiang hle. Sorkar anga an tih theih loh a mimalin a buaipui hi a lawmawm rualin, sorkar mawng hlìmna mai a ni," an ti a; minister hmalakna ang hian sorkarin hma la se, hri inkài chhàwnna tam tak chhut chah a nih ngei a rinawm thu an sawi.

Hripui darh dan enin, lockdown vanga chhut chah theih a nih hmel loa a lan thu sawiin BJP chuan, "Mizoram sorkar hian Health department hi chak taka a thuam a ṭul a, thawktu lâk belh pawh a pawimawh àwm e. Thla hnih dáwn lockdown hnuah pawh hri a la pung leh kàina chin hriat theih loh a tam tak danah hian, hri a darh nasa tawh hle tih a hriat. Random test hi kalpui ngei ni se tih chu kan ngaihdan a ni," a ti.