ASF vangin vawk 6,200 thi tawh

Mizoramah vawk pûl hri African Swine Fever (ASF) lênna infected area 109 a awm a, chu'ng hmunahte chuan ASF vangin nimin thleng khan vawk 6,200 a thi tawh.

Animal Husbandry & Veterinary (AH&Vety) department chhinchhiah danin, Mizorama district pakuaa khua/veng 109-ah ASF a léng tawh a, chu'ng hmunahte chuan ASF vangin vawk 6,200 a thi tawh laiin, dam lai 35,515 a la awm.

ASF infectead area páwn lamah chhan hriat lohin khua/veng 62-ah nimin thleng khan vawk 225 a thi tawh bawk.

Aizawl district-ah ASF infected area a tam ber a, khua/veng 62 awmin, 54 chu Aizawl khawpui chhungah a ni. Mizorama ASF hri kai vawk hmuh chhuah hmasak berna Lunglei district-a Lungsen khuaah March 21, 2021 khan vawk thi hmuh ṭan a ni a, nimin thleng khan vawk 757 thi tawhin, Mizorama khaw pakhata ASF vanga vawk thi tamna ber a ni.