Ram hruaitute'n ṭanpuina an pe

Mipui thlan tlin ram hruaitute zinga ṭhenkhat chuan nimin khan an bial chhungah ṭanpuina leh chhawmdawlna an hlân.

Aizawl East-II bialtu MLA Robert Romawia Royte chuan nimin khan YMA Day chibai bûk nan a biala veng pasarihah Rs. 10,000 ṭheuh a sem a, Aizawl South-I biala veng pasariha LTF-te leh CCCC-te hnenah Rs. 10,000 ṭheuh a pe bawk.

Aizawl South-I bialtu MLA C Lalsawivunga leh AMC Ward-XVI councillor R Lalawmpuii te chuan nimin khan an bial chhunga YMA branch hrang hrangte tlawh kualin, YMA Day chibai an bûk a, YMA branch pasarihte hnenah ṭanpuina sum an hlan. Local task force, CCC leh CCCC-te tlawh nghalin, ei leh in tur leh hmanruate an pe nghal a ni.

Lunglei South bialtu MLA Dr K Pachhunga chuan nimin khan a bial chhunga veng parukah task force hruaitute a kâwm a, Covid-19 donaa hmalakna tlangpui leh mipui leh VTF mamawhte a sawipui. Hripui laka invenna hmanraw chi hrang hrang a pe a; Hrangchalkawn Urban Health Centre tan oxygen concentrator leh pulse oximeter pakhat ve ve leh Ṭawipui South PHC tan oxygen concentrator pakhat leh PPE set panga a pe bawk.

AMC Ward-III councillor C Lalchhandami pawhin nimin khan YMA Day pualin ruihhlo ngaite enkawlna home ṭhenkhat - Grace Home (Chite), Thutak Nunpuitute Team (Muanna Veng), Synod Hospital K-Ward leh Operation Kingdom Ministry (Phunchawng)-te a tlawh a, ei leh in tur leh hmanraw chi hrang hrang a hlân. A bial chhunga LTF-te hnenah swap sample lâkna báwm a pe bawk a ni.