MPCB-in CCCC-ah zirtirna kalpui
Mizoram Pollution Control Board (MPCB) chuan nimin khan Aizawla Covid-19 veite enkawlna hmun, community covid care centre (CCCC) hrang hrangah bawlhhlawh sâwngbàwl an zirtir a, bungrua eng emaw zat an pe nghal.
MPCB-te hi hlâwm ngaah inṭhenin, Aizawla CCCC 35-ah kut tihfaina, hmunhma tihfaina, hmai tuamna leh bawlhhlawh báwmte an pe. Danin a phût angin bawlhhlawhte an paih theihna turin bawlhhlawh báwm chi thum ṭheuh an pe a, chu'ngte chu damdawi bawlhhlawh (bio-medical waste) paiha an thliar hranna tur báwm chi hnih leh bawlhhlawh pangngai paihna tur báwmte a ni.