Tui bill pek dan siamṭha turin phût

Mizoram Pradesh Congress Committee (MPCC) chuan nimin khan thuchhuah siamin, "Mi rethei zawkte dinhmun hre chungin tui bill pek dan siamṭhat ni rawh se," an ti.

MPCC chuan, June 11, 2021-a PHE Aizawl WATSAN Circle thuchhuah, tui connection tihtawpsak mekte'n connection an tih theihna tùr leh disconnect hnai, online-a bill pe thei lote tan bill counter hmun pangaah June 16-18, 2021 chhunga bill pek theih a nih thù an tarlan chu sorkar SOP bawhchhiatna leh online-a bill pe thei lo, mi rethei leh mi harsa zawkte chunga hléilennaa an ngaih thu an tarlang.

Covid-19 vanga total lockdown a nih lai chuan thla thum chhunga tui bill pe lote disconnect sak theihna dàn hman mek chu siam rem ni se an duh thu sawiin MPCC chuan, "Hripui avanga mi rethei, online hmanga bill pe thiam lo leh pe ve thei lo chhungkaw tam tak phurrit hi tihtawp dan ngaihtuah ni rawh se. Hripui lên laia bill dawngtu PHE hnathawkte him zawk dan tur sorkarin ngaihtuah bawk rawh se," an ti.

MPCC tarlan danin, Power & Electricity department-in June 1, 2021-a thuchhuah an siamah, 'Electricity bill, payment date May 1-31, 2021 inkar, lockdown avanga pek theih loh emaw, May 31, 2021 hnu lamah pawh lockdown chhunzawm a nih avanga bill pek theih loh chin zawng bill principal amount chu surcharge tel lovin next bill siam hunah arrear ah lak luh tur,' a tih chu ṭha an ti a; chutiang chu ti ve turin sorkar leh PHE department an phût a ni.

Congress party chuan, hripui vanga hun harsa ramin a tawh laia sorkarin a ngaihtuah ber tur chu mi rethei, chhungkaw harsa zawkte an ni tih sawiin, "Tun dinhmunah mipui páwn chhuak lo záwnga an him theihna tur ngaihtuah chungin, an bill tlêm tê awt lo a, a nei lote hnena pek belh zawk turin MNF sorkar kan phût a ni," an ti.