Khaw pathumin dawnfawh lian chi Cheng nuai 65 vel man an thar

Lengteng biala Ngopa, Làmzáwl leh Pàwlráng khuate chuan a vawi khatna atan kum liam ta khan dawnfawh an chíng a, tun hnaiah lockdown laiin Horticulture department puihnain hmun hrang hrangah hralhin, an hriat theih chinah cheng nuai 65 vel man an hralh tawh.

North Eastern Farmers Union (NEFU) chairman Lalengzauva Sailo, Ngopa chuan dawnfawh an chìn leh hralh chungchangah, "Méllung thar kan phunin kan hria. Hri léng karah Horticulture department-in min hralhsak nasa a, kan lawm hle a ni," a ti.

Lalengzauva Sailo chuan, dawn­fawh an chìn ṭan dawnah sorkara hotu pawimawhte leh Horticulture department-in an phûrpui hle nia sawiin, "Harsatna kan neih pawhin department lamin mithiam an rawn tír thuai zel ṭhin," a ti a; Khampat, Myanmar-a Mizo nu pakhat pasal, horticulture lama mithiamin khur laih, tui kawng siam leh dawnfawh chìn dan turte a zirtirin a riah chilh thu a sawi.

NEFU Chairman chuan, Myan­mar lama mithiam chu anmahni a buaipui mana an thar chhuah aṭangin sawma pakhat pe tura an inrem angin khaw pathumin an hralhna zawng zawng aṭangin Rs. 6,00,000 chuang an pek thu a sawi a; chuta ṭanga chhût chuan dawnfawh an hralhna aṭangin cheng nuai 65 vel an la luta ngaih a ni.

Dawnfawh an hralhte chu a theih ang angin Horticulture depart­ment-in an chhinchhiah thu te, kim taka chhinchhiah har mah se, a phurhnaa chhiate leh a thlâwna mi pek zawng zawng nen cheng nuai 65 man vel an tharah an ngai.

Dawnfawh hi pum 26,000 chuang an thar a, chu chu quintal 1,200 a ni. Làmzawl khuain thar tam berin, cheng nuai 38 vel man an thar a, Ngopa-in cheng nuai 23 vel man leh Pàwlráng khuaah mi pahnihin cheng nuai 4 chuang man an thar bawk. Dawnfawh an thar zinga a lian ber chu kg. 17 a ni a, kg. khat Rs. 50 man anga chhûtin Rs. 850 man a tling.

Dawnfawh hi a intiat lo a, kg. khat man Rs. 50-a chawhrualin, mimala thar tam ber Lalchungnunga, Làmzáwl chuan cheng nuai 13 vel man a thar a, Vanlalhruaia, Ngopa-in cheng nuai 9 vel man a thar bawk. Khaw pathumin dawnfawh an chìn hi Mizorama la chìn ngai loh a ni a, Horticulture department chuan kum liam ta khan khaw pathuma chhungkaw 25 an chìntir a ni.

NEFU Chairman chuan, hripui lèn laia dawnfawh an hralhnaah sorkar hotu te, bialtu MLA L Thangmawia leh Horticulture department-in an buaipui nasa tih sawiin, an lawm thu a sawi a, "Dawnfawh kan hralh ṭhat avangin kuminah hian chíngtu kan pun phah dawn a ni," a ti.

Khaw pathuma dawnfawh chíngtute thar chhuah hi Horticulture department chuan district hrang hrang - Aizawl, Lunglei, Champhai, Serchhip, Mamit, Saitual, Khawzawl leh Hnahthial district-ahte an zawrhsak. Horticulture joint director Lalhmingmawia chuan, “Vegetable Supply Chain angin kan kalpui a, kan Director Saipari hi secretary a ni tho a, staff-te'n kan buaipui ṭhin," a ti a; task force-ah a hláwmin an hralh tlangpui tih a sawi.