Naupang ICU buatsaih mek a ni

Covid-19 léng thawh thumna thleng thei laka inbuatsaih nan Mizoram sorkar chuan State Referral Hospital (ZMC)-ah hripui vei naupangte enkawlna bik tur intensive care unit (ICU) khum 20 awmna a buatsaih mek.

Vanglaini palai zawhna chhángin ZMC hotute chuan Covid-19 léng thawh thumna a thlen palha hripui vei naupangte enkawlna tur ICU an buatsaih mek thu an sawi a, "Khum 10 ve ve awmna Pediatric Intensive Care Unit (PICU) leh Neo-natal Intensive Care Unit (NICU) ruahman a ni a, kar leh lamah chuan hman theiha kan peih tawh a rinawm," an ti a; ICU dinna tura hmanrua mamawh angte an neih ṭhat thu an sawi.

PICU leh NICU enkawltu tur thawktu mamawh khawp an neih leh neih loh zawhna chhangin ZMC hotute chuan, "Covid-19 léng hian thawktu indaih lohna a thlen nasa a, tuna Covid-19 veite enkawlnaah pawh hian mamawh ang zat kan pha lo," an ti.

Tarlan tawh angin, June 8, 2021-a Health Minister hoa sorkar hotute ṭhukhawm chuan, Covid-19 thawh thumna thleng thei chu naupangin an tuar na dawna sawi a awm avangin SRH-ZMC-ah NICU ruahman mek a nih thu leh, chuta duty tur nurse-te training pek an nih dawn thu an tarlang a ni.