Kangmei chhuitute'n Lunglei an tlawh

Kumina Mizoram hmun hrang hranga kângmei chhuak chhui chiang tur leh chumi kaihhnawiha dan ding lai awmte zir chiang a, a ṭul anga hmalak dan tur rawtna siam tura Mizoram sorkarin a ruat State Level Special Investigation Team (SIT) on Fire Outbreak member-te chuan nimin khan Lunglei an tlawh.

Investigation team-te hi Lunglei DC Kulothungan A hoin sorkar official-te'n an lo dawngsawng a; Lunglei district-a kângmei tuar nasa ber Zotlang VC area (ram kang zau zawng hectare 645) chu tlawh hmasa berin, kângmei chhuah dan tlangpui leh a ṭhelh hna kalpui dan te, ram kan chhiat dante a hmunah an enfiah a ni. Chumi hnuah Chanmari leh a chhehvel an tlawh leh bawk.

SIT hian a hmuna an enfiah zawhah DC pisa conference hall-ah sorkar official, VC leh tlawmngai pawl hruaitute an kâwm a; kângmei chhuah dan, a chhuahna hmun, kângmei ṭhelh a nih dan leh Lunglei police-in an chhuina kal mekte sawiho a nih bakah, kângmei hmachhawn tura hmanrua leh mihring neih dante an thlirho a ni.

Lungleiah hian SIT hi an chairman RS Sinha, chief conservator of forests hoin, member pahnih - Fire & Emergency Services director Lalṭhafamkima Jongte leh DMR director John LT Sangte an kal a ni.