Pawl hrang hrangin ṭanpuina an pe

Mission Veng Presbyterian Kohhran chuan nimin khan Aizawla hripui vei tamna vengte zinga mi - Chhinga Veng leh Electric Veng mipui chhawmdawlna leh hripui veite tan Rs. 1,00,000 ve ve an pe. Ṭanpuina sum hi bialtu pastor Rev. Vanlalmuanpuia Khiangte leh Kohhran secretary Upa C Lalmuanpuia ten veng pahnih LTF-te hnenah an hlân.

Mizoram Distributors’ Association chuan nimin khan mi harsate ṭanpuina atan Rs. 1,45,000 an sem chhuak.

Sum an semnate chu - ZMC-ah Rs. 50,000, Saron Veng LTF leh Gujarat Mizo Zirlai Pawl hnenah Rs. 20,000 ve ve, Chhinga Veng, Bethlehem Veng, Electric Veng leh Bawngkawn LTF-te hnenah Rs. 10,000 ṭheuh leh, Falkland Veng, Edenthar Veng leh Dawrpui LTF-te hnenah Rs. 5,000 ṭheuh a ni.

Vestige Mizoram, Meriam L Hrangchal team chuan Vestige din champha vawi 17-na pualin nimin khan Zoram Medical College (ZMC) hnenah air purifier 31, extension cord 18 leh Vestige product chi hrang hrang, Rs. 6,13,125 man an pe.

Vision IAS Academy, New Delhi aṭanga Aizawl DC pisain tun hnaia Covid-19 dona hmanraw chi hrang hrang a dawnte chu nimin khan bawrhsap Dr Lalhriatzuali Ralte-in hmun hrang hrangah a sem bawk.

Bawrhsap hian Aizawl East CMO-ah oxygen concentrator 10 leh oxymeter 30, Aizawl West CMO-ah oxygen concentrator panga leh oxymeter 17, ZMC-ah biPAP ventilator paruk leh Aizawl SP pisaah oxymeter pahnih leh PPE set 50 a hlan a ni.