COVID-19: Mizoram dinhmun : Hripui vei 268 hmuh belh a ni

June 15, Thawhlehni khan Mizoramah Covid-19 vei mi 268 hmuh chhuah a ni a, June thla chanve chhungin mi 3,513 hmuh chhuah a ni tawh. Hripui vangin Thawhlehni zan leh nimin khan mi pakhat ve ve an thi a; nimin khan hripui laka fihlim tawh mi 112 chhuahtir an ni thung.

Covid-19 vei hmuh tharte chu mipa 132 leh hmeichhia 136 niin, Aizawla veng 33 leh khaw dang 17-a mite an ni a; ZMC laboratory-a hmuh chhuah 53, TrueNAT hmanga hmuh pahnih leh RAT hmanga hmuh 213 an ni.

Mi 268 zingah nau­pang kum tling lo 60 chuang awmin, a zatve aia tamin symptom an nei a; nausen kum khat tling lo panga telin, an zinga ṭhenkhatin symptom an nei. Kum 60 chung lam mi 20 vel awmin, a zatve velin symptom an nei a, kum 90 chuang mi pahnih awmin, a upa ber chu kum 94 a ni.

Mizoramah Covid-19 vei mi 15,899 hmuh chhuah a ni tawh a, mipa 9,205 leh hmeichhia 6,694 an ni. Nimin tlai dar 5:00 thleng khan mi 12,313 (77.45%) chhuahtir an ni tawh a, mi 72 (0.45%) thi tawhin, enkawl mek mi 3,514 (22.10%) an awm.

June 15, Thawhṭannia swab sample endik dan chu - ZMC laboratory-ah 905, TrueNAT hmangin district parukah 122 leh RAT hmangin district 11-ah 1,416 a ni a, a vaiin sample 2,443 (mipa 1,348 leh hmeichhia 1,095) niin, chu'ng aṭanga hripui vei hmuh chhuah 268 chu 10.97% a tling.

Thawhlehnia district-a Covid-19 positive hmuh dan chu - Aizawlah mi 221, Lungleiah 16, Kolasib-ah 12, Siaha leh Lawngtlaiah paruk ve ve, Champhai leh Saitualah pathum ve ve leh Mamitah pakhat a ni. IDSP tarlan danin, mi 268-te chu Covid-19 symptom nei 129 leh nei lo 139 an ni a; mi 267 chu Mizorama kái chhâwng niin, tun hnaia state páwn aṭanga lut mi pakhat chiah a awm. Tualchhunga kái zingah kàina chin hriat loh mi 110 an awm bawk.

Thawhlehni khan Aizawla veng pathumah active case search neih leh niin, RAT hmangin mi eng emaw zat swab sample endik leh a ni a; chuta ṭang chuan Covid-19 positive Armed Vengah mi 15, Dintharah mi 10 leh Phunchawngah mi paruk hmuh chhuah a ni. Hetih lai hian, Saron Vengah chuan bialtu MLA sensoin random test kalpuiah mi 419 endik aṭangin hripui vei mi 44 hmuh chhuah a ni bawk.

Nimin khan tlai dar 5 thlengin hripui laka fihlim tawh mi 112 chhuahtir an ni a; Aizawl district-ah mi 82, Lawngtlai district-ah 13, Siaha district-ah 10, Lunglei district-ah pariat, Mamit district-ah pali, Champhai district-ah pathum leh, Serchhip leh Saitual district-ah pakhat ve ve an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 5,648 hmuh chhuah a ni tawh a, TrueNAT-PCR hmangin 1,169 leh RAT hmangin 9,081 hmuh chhuah a ni tawh.

June 15, 2021 thlengin Mizoramah swab sample 4,38,999 endik a ni tawh a, chu'ng aṭanga Covid-19 positive hmuh tawh zat 15,899 chu 3.62% a ni. Hripui vei hmuh tawh zinga mi 12,184 chu Mizoram chhunga kái chhâwng niin, mi 3,715 chu Mizoram páwn aṭanga an rawn luh hnua hmuh chhuah an ni a; tualchhunga kái hi 8,469-in an tam zawk a ni.

COVID-19 VEI HMUH THARTE
Khua/Veng A zat
AIZAWL DISTRICT
Armed Veng 19
Armed Veng South 8
Bawngkawn 11
Bethlehem Veng 13
Bethlehem Vengthlang 11
Bungkawn Vengthar 1
Chanmari 1
Chawnpui 1
Chawlhhmun 2
Chhinga Veng 16
Dawrpui 2
Dawrpui Vengthar 2
Dinthar 22
Durtlang North 1
Electric Veng 10
Khatla 1
Muanna Veng 2
Phunchawng 9
Ramhlun South 1
Ramhlun Vengthar 1
Ramthar North 1
Ramthar Veng 7
Saron Veng 49
Tanhril 2
Tuikual North 1
Tuikual South 1
Tuithiang 2
Ṭhuampui 1
Upper Republic 3
Venghlui 4
Zarkawt 5
Zokhawsang 1
Zotlang 2
Sihphir 4
Sairang Dinthar 1
Tuirial Airfield 1

LUNGLEI DISTRICT
Lunglei College Veng 9
Lunglei Bazar Veng 1
Lunglei Electric Veng 1
Lunglei Salem Veng 3
Lunglei Venglai 1
Bindasora 1

SIAHA DISTRICT
Phura 1
Saikao 5
Siaha New Colony-III 1

CHAMPHAI DISTRICT
Champhai Bethel Veng 3

KOLASIB DISTRICT
Bairabi 6
Vairengte 5

LAWNGTLAI DISTRICT
Baganpara 2
Chawngte 2
(Kamalanagar)
Lawngtlai Bazar Veng 2

MAMIT DISTRICT
Dapchhuah 1

SAITUAL DISTRICT
Mimbung 3

KHAWZAWL DISTRICT
Khawzawl 2