MZP-in service provider-te an kâwm

MZP chuan nimin khan an pisaah Mizorama service provider zinga pathum - BSNL, Airtel leh Jio hotute an kâwm a; Mizoram hmun hrang hrangah mobile tower tam zawk bun leh signal ṭha zawk pe chhuak tura hmalak dan tur an sawipui.

MZP president B Vanlaltána chuan, tunlaiin zirlai exam mek tam tak an awm tih sawiin, "Exam tura inpuahchah mekte'n harsatna leh buaina an tawh ber chu signal a ni a, ramhnuaia exam hial a ngai hi pawi kan ti tak zet. Service provider-te hian hlâwkna chiah ûm lo a, mipui rawngbawltu in nihna hria a, tun aia nasa leh ṭha zawka rawngbawl hna thawk turin ka ngen che u a ni," a ti a; mobile tower-te chu hmangtu an pun zel avangin ṭha leh changtlung zawka bun belh turin MZP-in an beisei thu a sawi.

BSNL aiawh chuan, 4G leh 3G tender nghah mek a ni a, tihfel a nih veleha tower bun turin an inpuahchah mek thu a sawi a; tun hnaia Mizoram mipui tam takin harsatna an tawh chhan chu optical fibre zai chhiat leh kawng siamte'n hrui an tihchhiat ṭhin vang a nih thu a sawi a ni.

Airtel aiawha tel chuan, Mizorama tower bun belhna tur project an kalpui mek thu sawiin, Airtel tower awmna hmuna signal chhia chu customer care complaint-na siamah rang taka hriattir ṭhin tur leh an harsatna thlen vat turin mipui an ngen tih a sawi a; khawpui chhungah duh anga signal a chak lo ṭhin chu, an duh anga tower bunna tur leh hmun an hmuh loh ṭhin vang a nih thu a sawi bawk.

Jio aiawh chuan, tower 19 bun belh an tum mek thu leh Covid-19 léng avanga la tifel thei lo an ni thu sawiin, Mizoram hmun hrang hranga tower awm tawh la nung lo chu sum leh pai lam buaina ni loin, optical fibre a la thlen loh vang a nih thu a sawi.