KHAWTHLIR

HSSLC 2021 result
MBSE chuan naktuk June 18, Zirtawpni chhun dar 12 hian Higher Secondary School Leaving Certificate (HSSLC) Examination 2021 result a tichhuak dawn. Result hi MBSE website www.mbse.edu.in ah en theih a ni ang a, MBSE office-ah result bu lei theih a ni bawk ang. MBSE office tualah result tàr chhuah a ni dawn lo.

Thisen pe
Nimin khan Civil Hospital, Aizawl Blood Bank-ah mimala a thlawna thisen pe (individual voluntary donation) mi 35 an awm. Hetih lai hian, pek bik nei leh hman tawh rulhna (replacement) atana pe mi 126 an awm thung.

Containment zone
Phunchawng veng huam chhunga hmun ṭhenkhat, Aizawl DC Dr Lalhriatzuali Ralte-in containment zone-a a puan tawhte bakah, hmun dang - Vanapa Section leh Khuangchera Section hmun ṭhenkhat chu micro-containment zone-ah a puang. Hetih lai hian, Dawrpui venga hmun ṭhenkhat, containment zone-a puan tawh chu hlih a ni thung.

Meizial man
Serchhipa hmunpui nei Assam Rifles leh Customs Preventive Force, Champhai-te chuan nimin khan Champhai Chhungte huam chhungah ram dang meizial Rs. 15,60,000 man leh a neitua puh mi pakhat an man.

Taxi chesualah thi
June 15, Thawhlehni zan dar 9 vel khan Khawzawl dáiah taxi a chesual a, a khalhtu Zuimawia (36) s/o Dawntuma, Khawhai chu chetsualna hmunah a thi. Taxi-ah hian mi pahnih an chuang a, Zuimawia chuanpui erawh chu ngaihtuahawm a ni loa thu dawn a ni. Zuimawia hi Aizawla khawsa a ni a, Khawhaiah passenger a dah, Aizawl pana a let leh lam a chesual a ni.

Hripui vei 28 hmu
Nimin khan Armed Veng South containment area-ah Covid-19 active case search neih niin, swab sample endik rûnpui kalpui a ni a; mi 121 endik zingah hripui vei mi 26 hmuh chhuah a ni. Containment pawna awm mi pahnih hripui vei hmuhchhuah an awm bawk.