Covid vei in lama inenkawlna app tlangzarh
Covid-19 hripui vei zinga mahni in lama inenkawl (home isolation)-te online hmanga vilna tur, Nishtha Teletrack application chu nimin khan Health minister Dr R Lalthangliana’n video conferencing kaltlangin a tlangzarh.
Health & Family Welfare Minister chuan, Nishtha Teletrack chuan awlsamna a thlen dawn nia sawiin, hripui vei ina inenkawlte'n chhawr ṭangkai se a duh thu a sawi.
Dr R Lalthangliana chuan, "Sorkar laipuiin inkaihhruaina a tihchhuah thar berah Covid-19 hri kai zinga symptom nei lote leh symptom-na vak lo neite chu in lamah inenkawl tur a rawn ti tawh a, inenkawlna hmun tura ruat bikahte hi chuan a hlâwma awm an nihna laiah doctor leh nurse-te tan vil a harsa lo a, in lama inenkawlte hi inkalchilha invil a hautakin a buaithlak em em a ni," a ti.
Nishtha Teletrack hi mobile leh web-based application a ni a, thla tum chhunga hman atan ruahman a ni. Application hi Covid Helpline doctor duty-te'n home isolation-a awmte mumal zawka an enkawl theih nan National Health Mission (NHM) chuan JHPIEGO nen ṭang dunin an duang a, United States Agency for International Development-in senso zawng zawng a tum a ni.
Application hmang hian Covid-19 vei damlote chu Covid Helpline aṭangin biak (call) an ni dawn a, damlo mamawh dan azirin online hmangin doctor-te ràwn theih an ni dawn. Dietician-in ni bik ruatah ei leh in chungchang a zirtir a ang a, clinical psychologist-te'n rilru lama inbuatsaihna an buaipui bawk ang.
Nishtha Teletrack hmang hian ni tin khawsik san zawng, SpO2 leh ṭul dangte dah (upload) theih a ni dawn a, chu chu Helpline aṭangin vil a ni ang. Rîkrum thilah pawh damdawi-ina enkawl ngaite hriat zung zung theih tura ngaih a ni.