Sorkarin tualchhunga siam PPE hmang turin hma a la

Mizoram sorkar chuan personal protective equipment (PPE) tual­chhunga siam hman a tum a, chuta tan chuan local task force (LTF)-te chu an huam chhunga PPE ṭhui thei tur zawng chhuak turin a ngen.

SDMA State Executive Committee (SEC) chuan Covid-19 avanga harsatna thleng mekah, puanṭhui hmanga eizawng, hna thawh tur nei lote'n thawh tur an neih theihna atan tualchhunga ṭhui PPE hman ṭha a ti a ni.

Chumi bawhzui tur chuan Commerce & Industries departmnent ruat a ni a, anni hian LTF-te hnenah an huam chhunga total lockdown avanga an eizawnna chhunzawm thei lo puan ṭhui thiam zawng chhuak tura ngenna an thawn a ni.

Mizoram sorkar chuan PPE set 36,000 vel ṭhui turin ruahmanna a siam a, a thawh khatnaah set 15,000 ṭhui tura hmalak a ni. PPE chu zai sa vekin a ṭhui turte hnenah pek a ni dawn a, pakhat ṭhui man Rs. 150 a ni ang.