Mizoramin ni 100 inhlawhna atan Cheng nuai 22,291.18 a hmu tawh

Rural Development (RD) minister Lalruatkima chuan nimin khan MGNREGS hnuaia inhlawhna chungchangah thuchah a tichhuak a; sorkar laipuiin Mizoram sorkar hnenah kum 2021-22 chhunga ni 100 inhlawhna atan cheng nuai 22,291.18 a pek chhuah tawh thu a tarlang.

Lalruatkima chuan, Covid-19 hripui léng vanga harsatnate chhâwk zângkhai a nih theih nan RD department-in theihtawp a chhuah niin a sawi a, "Sorkar laipui pawh theihtawpin kan dawr a, kum 2021-22 chhunga MGNREGS hnuaia inhlawhna turin Ministry of Rural Development chuan April 2021 khan cheng nuai 7,788.34 a rawn pek bakah, June 14, 2021 khan cheng nuai 14,502.84 an rawn pe leh a, a vaiin cheng nuai 22,291.18 an rawn pe tawh a ni," a ti a; ni 100 inhlawhna a nih angin kum 2021-22 chhungin ni 100 inhlawhna buatsaih theih a beisei thu a tarlang.

Zampui, Tripura-a Phuldungsei khaw mite chu Mizoram sorkar hnuaiah a vawi khat nan June 14, 2021 aṭangin ni 100 inhlawhna hnuaiah an inhlawh tih sawiin Lalruatkima chuan, "Mizoram sorkar chu Zo fate tan a ding tlat dawn. RD department mai bakah, sorkar department dangte pawhin mahni theihna zawn ṭheuhah chhuanchham kan awm lohna turin hma an la a, gas, buhfai leh thil dangah pawh kan dinhmun a ṭha rih hle," a ti a; chief minister Zoramthanga hmalakna fakawm a tih thu a tarlang.

RD Minister tarlan ṭhenkhat
1. Ministry of RD-in kum 2021-22 chhunga ni 100 inhlawhna atan cheng nuai 22,291.18 a rawn pe tawh.
2. Kum 2021 aṭangin job card holder pakhatin ni khatah Rs. 233 (2020-21 ah Rs. 225) zel an hlawh dawn.
3. Mizoram pumah job card holder mi 2,05,607 an awm.
4. District hrang hrangah kumin April-August thla chhungin ni 47 inhlawhna siam theih beisei a ni.