Covid-19 hripui donaa hlawhchhamah ZPM party-in Mizoram sorkar an puh

ZPM party chuan Covid-19 hripui do kawnga hlawhchhamah Mizoram sorkar an puh a; swab sample endik rûnpui a chak thei ang bera kalpui turin sorkar an ngen nawn tih an tarlang.

ZPM tarlan danin, Covid-19 léng thawh hnihna Mizorama a thlen hma, kumin January leh March thla laihâwl inkarah Mizorama hri léng hre chiang turin swab sample 112 chu phai lamah thawn a ni a, chu'ng zinga 10 chu a hlauhawm ber chi, Delta Variant an tih, inkai darh awlsam ber leh hlauhawm ber chi a ni.

Covid-19 hlauhawm chi Mizoramah a lut tawh tih chu sorkarin official report a dawng daih tawha a rinawm thu sawiin ZPM chuan, "Puanzara inzirtir a ṭul teh reng nen, vawiin thleng hian thupin a zêp char char mai a lo ni. Thu dik pawh min hrilh ngam lo sorkarah hian rinna nghah ngam a harsa a, a vanduaithlak," an ti a; chuti chunga Mizoram páwn aṭanga rawn hawte darkar 96 chhunga negative certificate an neih chuan chhuah zalen an ni zel ṭhin chu mak an tih thu an tarlang.

Hripui léng chungchangah mithiamte thurâwn anga sample test leh hripui vei damlote enkawlna buatsaih kawngah Mizoramin hma a sawn thei lo nia sawiin ZPM chuan, "Beiseina sang tak nen ṭan rual hun a ni tiin sawisel mai loin, thuràwn hrang hrangte kan pe a, sorkar hi thawhpui tumin vawi tam tak ngenna kan chhuah tawh a ni," an ti.

ZPM party tarlan dangte
→ ZMC aṭanga hlawh la thawktu mi 60 chuang hmun danga pawhpên nia sawi hi a dik a nih chuan a fel lo hle.

→ Laboratory pakhat bak kan la neih belh lo. Kum khat liam hnuah pawh phuahchawp (makeshift) ICU tih loh chu ICU pangngai pakhat pawh kan la neih belh lo.

→ May 2021-a hripui kái hmuh chhuah 6,268 zingah natna lang chhuak an tam zawk. Hri vei si, test loha rei tak an awm vang a ni. Natna a lan chhuah hnuah tihdam a har tawh a, ICU-a lut an tam phah a, thi pawh an tam phah niin a lang.

→ India ramah recovery rate 95.43% a nih laiin, Mizoramah 76.46% chauh a ni a, a hniam ber kan ni. Chuti chunga a ti ṭha bera kan la inchhál hi a zahthlak hle.

→ Sorkar hian test a kalpui chak lo tih a lang chiang. Medical Operation Team Chairman thusawia a lan dan phei chuan, test tam a, hri kai hmuh chhuah chak sorkarin a hlau hle niin a lang. Mawhphurhna lâk aiin, mawhpuh tur sorkarin a zawng zel hian sorkar hlawhchhamzia a tarlang.

→ June 15, 2021-a minister pakhatin a bial chhungah ama sum sênga mass testing drive a kalpui kha lawmawm kan ti hle. Aizawl North-II MLA Dr Vanlalthlana pawhin May 18, 2021-a Health Minister-in Aizawla MLA leh councillor-te a koh khawm ṭumin test samkhai zawkna turin bial chhunga testing kiosk din leh ṭul dangte tih phalna a dil pawmsak a ni ta lo kha a pawi hle a ni.

→ Inkhàrkhip ringawt hi hri darh tur vên nan a tâwk zo lo a, kan dampui zo ta lo tih a lang chiang. Test rûnpui neih a, natna lan chhuah hmaa enkawl vat te, a chak thei ang bera vaccine pek te, hmanrua leh thawktu lak belh te, sorkar laipui duh dan anga department hrang hrangte budget 20%-a tihtlem te, test rûnpui a chak thei ang bera ti turin sorkar kan ngen nawn leh.