High Court-in RT-PCR thubuai a ngaihtuah ṭan : RT-PCR bun tum tâwk loah Court-in Mizoram sorkar a ngai

RT-PCR for Chhimbialin Lungleia RT-PCR bun a nih theihna tura an zualkona chu Gauhati High Court (GHC), Aizawl Bench chuan nimin khan a ngaihtuah a; Court chuan Mizoram sorkar chu RT-PCR bun tum tâwk loah a ngai.

Tarlan tawh angin, RT-PCR for Chhimbialin public interest litigation (PIL) an thehluh chu June 14, 2021 khan pharh a ni a, Division Court ngaihtuah tura tih a ni. Court chuan nimin khan ngaihtuah ṭanin, June 23, 2021-ah a ngaihtuah chhunzawm leh ang.

High Court chuan, thla hnih chhung lockdown puan a ni tawh chuan Mizoramah hripui lêng a nasat (serious) zia a tilang tih tarlangin, "Hetiang a ni chunga miin RT-PCR an pek tawh Mizoram sorkarin kum khat hnuah pawh bun a tum lo hi a mak hle. DIPR-in June 15, 2020-a an tarlan danin, RT-PCR khawl hi chhim lam district palite'n an mamawh hle a ni," a ti.

Sorkarin mipui tan a tih theih ṭha ber tih chu a bat a ni tih tarlangin Court chuan, "Hospital & Medical Education Director-in May 7, 2021-a lehkha a tihchhuah aṭangin RT-PCR khawl hi Civil Hospital, Lungleia Microbiology department-ah bun theih a ni tih a tichiang," a ti a; Lungleia RT-PCR bun chu Covid-19 dona atan ṭangkai tak a nih tur thu a tarlang.

Gauhati High Court tarlan danin, Mizoram chuan hripui léng mek dona atan test tam zawk neih theih a ni tih, DIPR-in June 2, 2021-a an report aṭangin a lang chiang a ni.

Mizoram sorkarin Lungleiah chauh ni lo, district khawpui dangah pawh RT-PCR bun a tum lo chu hriatthiam harsa a nih thu tarlangin High Court chuan, "Ministry of Home Affairs-in March 23, 2021-ah district zawng zawnga RT-PCR hmanga Covid-19 dona atana test tihpun a ṭul thu an tarlang a ni," a ti.

Mizoram sorkar ukil chu Hospital & Medical Education Director-in May 7, 2021-a lehkha a tihchhuah anga hmalak a nih dan te, district hrang hranga RT-PCR khawl dah zat te, RT-PCR hman meka technician awm zat leh an awmna hmunte leh Health department hnuaia microbiologist, laboratory technician leh health worker post ruak awm zat thehlut turin a hriattir.

Heng bakah hian sorkar ukil chuan Zoram Medical College RT-PCR laboratory-a microbiologist, laboratory technician leh health worker inpe (volunteer) zat leh shift khata duty zat a thehluh a ngai dawn bawk a ni.