Covid-19 vei mi 12 hmuh a ni Chî-âi viau a sâwt lo - Health Minister

Health Minister hian ni­min khan Secretariat con­­ference hall-ah thuthar thehdarhtute kâwmin, June 1 khan Zoram Medical College (ZMC) Covid-19 Laboratory-ah mi 116-te swab sample endik a nih thu a sawi a, "Zan dar 10 velah result chhuakin, mi 12 chuan Covid-19 an vei tih hmuh chhuah a ni. Covid-19 veite hi mi 10 chu Delhi aṭanga rél hmanga rawn haw an ni a, mi pahnih chu motor hmanga Kolkata aṭanga rawn haw an ni. Mipa pakhat leh hmeichhe 11 an ni a, Kolasib district mi 11 leh Aizawl district mi pakhat an ni," a ti.

Covid-19 hripui vei hmuh tharte chu kum 18-40 inkar an nih thu sawiin R Lalthangliana chuan, "Pakhat chu ZMC-a awm sa a ni a, a dang zawng chu Kolasib district-a quarantine facility-a awm an ni. Tunah chuan ZMC-ah dah vek an ni tawh. An hriselna a ṭha a, symptom an neih hriat a ni lo. Rélah social distancing kalpui theih a ni lo a, kan fimkhur hle pawhin kai theihna chance a awm a ni," a ti a; hripui veite chu an fimkhur loh vanga kai an nih a rinawm loh thu a sawi.

Health Minister chuan, Covid-19 vei neih chu duh dan ni lo mah se, an awm tâkah chuan rah ṭha chhuah se a duh thu a sawi a, "Páwngpaw mangan viau a sâwt lo. Positive kan neih vanga mamawh bak thil lei vak kherte a ṭul lo. Fimkhur hle a ngai a, kan fimkhurna tur erawh chu kan ngaihtuah thiam a pawimawh. Qua­rantine centre-a awmte pawh an tih tur leh tih loh tur te, an chhuah dáwnah pawh an awm zel dan tur hrilh vek an ni," a ti.

Home minister Lalcham­liana pawhin thu sawiin, an hlauh rûk boruakin a nan thu a sawi a, "Kan unau te, kan fate'n lo haw an duh si a, khawi lai aṭang emawin kaina chance sang mah se, 'Lo haw suh u' tih ngawt theih a ni lo. A lo thlen kan rin rûk reng a lo thleng ta a ni," tiin, chîâi lo turin mipui a ngen a; sorkarin tih tur leh tih loh tur inkaihhruaina a duante zawm ṭhat a nih chuan Mizoram a him phah theih tur thu a sawi. 

Hmai tuam, kut sil ngun, hand sanitizer hman leh social distancing lamah Mizoram mipui an inthlahdah deuha a hriat thu sawiin Lalchamliana chuan, "Mask vuah lo leh social distancing vil turin police station-ah flying squad din a ni a, an huam chin an vil 

ang," a ti.

Chief Secretary leh Health Secretary sawi danin, state páwn aṭanga rawn hawte chu rapid antibody test (RAT) hmanga endik vek an ni a; hripui vei hmuh thar mi 12-te chu RAT-a reactive (positive) vek an ni.

Aizawl district-a mi chu RAT-ah a reactive avangin quarantine centre-a dah loin ZMC-ah dah nghal a ni a; Kolasib district-a mite chu quarantine centre-ah dah niin, Real Time Polymerase Chain Reaction (RT- PCR) hmanga swab sample endiknaah an positive avangin ZMC-ah hruai nghal an ni bawk.

Mi 12-te chu an hri­selna dinhmun a ṭhat avang leh symptom (natna lan chhuah dan ang) an neih loh avangin Kolasib-ah pawh enkawl theih an ni a, mahse, Mizorama tangkhang an state lama haw tur leh Mizorama rawn haw tur an la awm avangin, hmunhma lam ngaihtuah thilah ZMC-ah dah niin, Isolation Ward pang­ngaiah dah an ni.

Covid-19 vei hmuh chhuah tharte'n an kai chhàwn theih àwmte chu Police leh Health department lamin an chhui zui nghal a, RT-PCR hmanga endik vek an ni ang.

•    Covid-19 veite hriselna dinhmun a ṭha a, anmahniah symptom a lang lo; Isolation Ward-ah dah an ni.

•    Positive-te hi an vaiin RAT reactive vek an ni.

•    Positive an awm avangin mamawh bak thil lei vak kher a ṭul lo.

•    Sorkarin tih tur leh tih loh tur a siamte zawm ṭhat a pawimawh.

•    Hmai tuam lo leh social distancing zâwm ṭha lo vil tur flying squad din a ni.

•    Covid-19 veite'n an kai chhàwn theih àwmte chu Police leh Health department-in an chhui zui nghal.