Sorkar hnathawkte'n an hlawh aṭangin CM Relief Fund-ah cheng nuai 300 an pe

Mizoram sorkar hna­thawk páwlte intèl khawm­na, Federation of Mizoram Government Employees & Workers (FMGEW) hnuaia pawl hrang hrangte'n Covid-19 dona atana an hlawh aṭanga an thawh khawm cheng nuai 300 chu nimin khan Chief Minister Relief Fund for Covid-19 ah an chhûng lut.

Chief Secretary nena an inkawmna bawhzuiin FMGEW chuan May 6, 2021 khan an hnuaia páwl hruaitute ko khawmin, Covid-19 dona atana hlawh thawh chungchang an rêl a; inhmuh khawmnaah chuan ni khat hlawh thawh an remti a ni. Department hrang hranga drawing and disbur­sing officer (DDO)-te chu an establishment ṭheuhah thawhlawm la khawm tura ngen an ni.

FMGEW hruaitute hnen aṭanga Vanglaini thu dawn danin, sorkar hnathawkte hlawh thawh khawm zawng zawng chu cheng nuai 300 chuang a ni tawh. A thawh khatna atan mamawh zualpui phuhrûkna turin cheng nuai 300 chu CMRF-ah an pe phawt a ni.

Sorkar hnathawkte'n an ni khat hlawh an thawh hi a luh khawmna tura tihah a la lut zel a, lut khawm zat tur hriat theih a ni lo. Hlawh thawh remchang lote DDO hnenah inhriattir tura tih a nih angin, thawh remchang lo mi eng emaw zat an awm bawk.

FMGEW chuan thuchhuah siamin, thawhlawm a la luh belh zel thu an tarlang a, "A luh kim hunah CMRF-ah chhûn luh leh a ni ang. Kan ramin a mamawh hun lai taka thawhlawm thawhtu kan member-te chungah lawmthu kan sawi a ni. Chief Minister Office aṭang pawhin lawmthu sawina ziakin kan dawng nghal a ni tih member-te kan inhriattir e," an ti.