Sorkar chêt dan ZLP-in pawi an ti
ZPM Legislature Party (ZLP) chu nimin khan an ṭhukhawm a, hripui léng kara bungrua leinaah uchuak taka mimal hlâwkna tur sorkarin a buaipui tel anga a lang ṭhin chu pawi an tih thu an tarlang.
ZLP ṭhukhawm hian Mizoram sorkarin Covid-19 dona atana sum a hman dante an thlirho a, "Kan sorkarin hripui léng karah bungrua leina lama uchuak taka mimal hlâwkna tur a buaipui tel anga a lang ṭhin hi pawi kan ti," an ti.
NEC aṭanga sum dawn, NHM hnuaia sum hmannaah khawsik enna kháwl (thermal camera) pali lei nan cheng nuai 40 chuang hman a ni leh ambulance pathum lei nan cheng nuai 48 hman a nite chuan 'mawza man to' a hriat chhuahtir thu ZLP chuan an tarlang.
ZLP thuchhuah chuan, "Mipui mamawh leh ṭul ngaihtuah hmasa loa airport man to taka siam ṭhat leh mau ṭiak man to taka lei tuma tender koh ṭãlh a, mimal sum siamna awlsam ngaihtuah vanga tih luih a ni hi mipui zah lohna lian tak a ni a, pawi kan ti tak zet a ni," a ti.
High Court-in a khak hial ngaia Covid-19 dona lama sorkar thâ a ṭhum chu zahthlak an tih thu sawiin ZLP chuan, "Rálpui kan beih lai hian kan state CM hi bibo mai lo a, hma lam aṭanga min hruai tawh turin kan ngen a ni," tiin Chief Minister an ngen a ni.