Horticulture dept.-in tomato hralhna buaipui

Horticulture department hmalaknain Serchhip leh Khawzawl Horticulture Division hnuaiah kut hnathawktute'n tunlai hian tomato leh bawkbàwn an thar mek a, a hralhna tur Horticulture department-in Aizawlah a buaipui.

Horticulture department aṭanga Vanglaini thu dawn danin, Kumin June 2021 chawhma lam khan Léng, Hualtu leh Tualte aṭangin tomato kg. 9,525 an hralh tawh a, an hralhna aṭangin Rs. 8,87,540 an hmu tawh a ni.

Horticulture division hrang hrangah kut hnathawktute'n hlâwk zawka thlai an thar theih nan greenhouse an pe a ni. Serchhip Division-a Léng cluster-ah chhungkaw 10 hnenah greenhouse pahnih zel an pe a, green house tê zawk sq.meter 100-a chìnte chu an thar mek a ni. Tomato chíngtute'n kum 2018 aṭangin kum tina lo neih an bànsan tawh.

Hualtu khuaah chhungkaw 13 hnenah greenhouse lian leh tê an pe a, green house ni loah chhungkaw 16-in an chíng bawk. Hmunṭha khuaah chuan chhungkaw 13 hnenah greenhouse pek a ni a, anni hian an la thar lo.

Covid-19 total lockdown avangin kut hnathawktute'n an thlai thar hralhnaah harsatna an tâwk ṭhin a, chuvang chuan Horticulture department chuan a hralhna an buaipuisak ṭhin. Tomato chu Aizawlah phurh luh a ni a, veng hrang hranga an pek theih nan Aizawl DC-in phalna a pe a ni. Tomato hi kg. khat Rs. 110 man a ni a, a hlâwma leiin Rs. 100 hisâpin lei theih a ni.