Beichhua'n PMMVY hmanrua tlangzarh

Social Welfare minister Dr K Beichhua chuan nimin khan a pisaah Pradhan Mantri Matru Vandana Yojana (PMMVY) kaltlanga nu, nau pâi leh nau pawmte hman tur 'Naupai tana chaw leh hrisel' tih lehkhabu, hmai tuamna leh infant stimulation chart-te tlangzarhin a sem chhuak.

Dr K Beichhua chuan, nau pâi leh pawmte hriselna atan sorkar laipuiin PMMVY a duang tih sawiin, "PMMVY hi a nihna tur ang taka kalpui a nih chuan nau pâi hrisel lo a awm theih dawn loh a, mipuiin ṭangkai taka an hman ka duh," a ti a; Serchhip district-in a záwnin India ram puma PMMVY kalpui ṭha ber lawmman a lak thu leh theihtawp chhuah chhunzawm zel tura a duh thu a sawi.

PMMVY hi nu nau pâi leh pawmte tana hamṭhatna tura sorkar laipuiin a duan a ni a; PMMVY-a tel turin anganwadi centre-ah inziah luh tur niin, nuin nau a pâi leh a pawm chhunga a inenkawlna senso phuhrûk nan Rs. 5,000 dawn theih a ni.

PMMVY scheme kaltlang hian Mizoramah mi 23,527-in ṭanpuina an dawng tawh a, India ram puma PMMVY kalpui ṭha zingah Mizoram chu palina a ni mek.