Inkhàrkhip kaihhruaina tihdanglam a ngaih vak ka ring lo - CS

Chief secretary Lalnunmawia Chuaungo chuan, Mizoramah Covid-19 vei mi 12 hmuh thar ni mah se, inkhàrkhip thawh ngana atana kaihhruaina siam tawh chu tihdanglam ngai a awm vak a rin loh thu a sawi.

Vanglaini palai zawhna chhangin Lalnunmawia Chuaungo chuan, inkhàrkhip kaihhruaina chu tuna thil thleng mekte a thleng thei tih hre reng chunga duan a nih thu a sawi a, "Kan la inráwn khawm lo a, ka mimal ngaihdan chuan tihdanglam ngai vak a awm ka ring lo. Tuna kan kalphung pangngai hi a tâwk. Kan la sawiho zel ang," a ti.

Chief Secretary sawi danin, hmarchhak state aṭanga lo hawte tiam lohin Covid-19 vanga tangkhang mi 6,300 chuang Mizoramah an rawn haw tawh a, tunah hian Mumbai leh Pune leh a chhehvela tangkhang mi 1,360 vel chu rélin an rawn haw mek. Haw mekte bakah hian haw duh inhriattir mi 1,716 an la awm a, an rawn haw hun tur hriat a la ni lo.

Mumbai leh Pune aṭanga rawn hawte chu Lumding leh Badarpur inkarah rél kawng a chhiat avangin an thleng thei lo a, nizan khan Guwahati an thleng tura ngaih a ni. Rél kawng chhia siam chhung a rei dawn avangin Guwahati aṭangin bus hmanga hruai haw dan tur ngaihtuah mek a ni.