Cancer damdawi man tláwm leh MR bill

Mizoram State Health Care Society (MCHCS) principal chief executive officer (CEO) Dr Chawngthanchhunga chuan, cancer enkawlna damdawi man tláwm thlan chhuahte hmanga inenkawlna senso chu July 2021 aṭangin sorkar aṭangin hmuh lêt theih a nih dawn thu a tarlang.

MSHCS Principal CEO chuan, Mizoram State Cancer Institute (MSCI) Indoor Pharmacy, Zemabawkah cancer enkawlna damdawi man tláwm lei theih a nih thu tarlangin, "District hospital leh damdawi-in dangte'n an mamawh angin MSCI aṭangin an la chhâwng thei bawk ang. Mimal damdawi zuarah erawh chuan heng damdawi man tláwmte hi zawrh a ni dawn rih lo," a ti.

Principal CEO tarlan danin, May 21, 2021-a Finance department hriattirna angin, sorkar hnathawk MR, Health Care Scheme leh ABPM-JAY-ahte cancer enkawlna damdawi man tláwmte chu bill theih a ni dawn a, rate ang zelin inenkawlna senso siam tawh tur a ni. Hei hian cancer enkawlna damdawi chi 47 leh albumin infusion a huam a, chumi baka inenkawlna damdawi chu rate pangngai angin siam tur a ni. A man tláwm mila bill siam chu July 2021 china inenkawlna bill turteah hman ṭan a ni ang.

Damdawite chu man tláwm zawka mipuiin an lei theih turin Mizorama hman ṭhan damdawi company ṭha leh rintlaka ngaihte aṭangin chah a ni a; cancer enkawlna damdawi man tláwm rate mila sorkar hnathawk MR, Health Care Scheme leh ABPM-JAY bill pek chhuah chungchangah sorkar damdawi-in leh mimal damdawi-inah danglamna a awm lo.