Covid-19 vangin mi 3 thih belh

Covid-19 vei State Referral Hospital (ZMC)-a enkawl mek zinga pathum chu nimin khan an thi a; sorkar chhinchhiah angin, nimin tlai dar 5 thleng khan Mizo­ramah hripui vangin mi 75 an thi tawh.

Lallawmpuia (41) s/o R Lalengmawia (L), Venghlui chu Nilaini zanlai pelh hnu, nimin zing dar 1:20 khan SRH-ZMC-ah a thi a, nimin khan vui a ni. Lallawmpuia hi natna dang nei sa a ni a, Covid-19 positive a ni tih May 15, 2021-ah hmuh chhuah niin, SRH-ah dah luh nghal a ni. A nu, Lalrokimi pawh Covid-19 vangin May 31, 2021 khan a lo thi tawh bawk.

Hmangaihzuali (35) w/o Samuel Laithanmawia, Tuithiang, Aizawl pawh nimin zing dar 3:02 khan hripui vangin SRH-ZMC-ah a thi a, nimin khan Tuithiang YMA Hall-ah vui a ni. Covid-19 positive a ni tih May 26, 2021-ah hmuh chhuah niin, SRH-ah dah luh nghal a ni a; a nau pai lai pawh June 4 khan SRH-ah zai chhuah niin, naute dinhmun a ṭha tih sorkar thuchhuakin a tarlang.

Nimin vek chawhnu dar 2:15 khan Covid-19 vei enkawl lai Hreumawii (88) w/o Hniarpuma (L), Electric Veng, Aizawl chu SRH-ZMC-ah a thi a, nizan khan Electric Veng YMA Hall-ah lumen niin, vawiin chawhma dar 11-ah vui a ni ang. Hreumawii hi hripui vei a ni tih June 4, 2021 khan hmuh chhuah a ni a, hemi ní hian SRH-ZMC-ah dah luh nghal a ni.

Nimina chhuak Vanglaini-ah hripui vanga June 15, Thawhlehni zan leh June 16, Nilaini zinga thi mi pahnih tarlan hmaih a ni a; chu'ngte chu Thanmawii (92), Sairang Dinthar, June 15 zan dar 6:30-a an ina thi leh Thangkungi (88) w/o Thinlaihnema (L), Saitual (temporary address - Electric Veng, Aizawl), June 16 zing dar 9-a thite an ni.