KHAWTHLIR

Governor leh AR DG
Governor PS Sreedharan Pillai leh Assam Rifles hotu lu ber director general Lt.Gen. Pradeep Chandran Nair te chu nimin khan Raj Bhavan-ah an inkâwm a, Mizorama Assam Rifles hnathawhte leh thil pawimawh dangte an sawi dun. AR DG hi inspector general Maj.Gen. Ranjit Singh leh 23 Sector DIG Brig. Digvijay Singh ten an ṭawiawm a ni.

Thisen pe
Mizo Professional Footballers Association chuan nimin khan Civil Hospital, Aizawl Blood Bank-ah thisen unit 8 an pe.

Kawng khar dawn
Traffic SP Rodingliana Chawngthu chuan, vawiin zing dar 5 aṭanga chawhma dar 11 inkarah Bungkawn Vengthar kawngpuiah chawhmeh bazar hawn a ni dawn avangin, kawngpui khar a ni dawn tih a puang. MMV leh HMV-te chu zing dar 5 aṭanga tlai dar 5 inkarah tlan phal a ni lo tih a tarlang bawk.

CM Relief Fund
State Institute of Rural Development & Panchayat Raj chuan nimin khan Covid-19 dona atan Chief Minister Relief Fund-ah Rs. 76,524 an chhûng lut a, chief secretary Lalnunmawia Chuaungo-in Rs. 15,000 a thawh bawk.

Phalna hmun ni loah test phal loh
Lunglei chief medical officer Dr LC Liana chuan, Mizoram sorkarin phalna a pek hmun ni loah Covid-19 swab test tih phal a nih loh thu a tarlang a, "Test kan awm a nih chuan a ṭul angin hmalak a ni ang a, Health & Family Welfare department-in mawh a phur lo ang," a ti. Lunglei Civil Hospital, Christian Hospital leh John Williams Hospital-ahte swab sample endik theih a nih thu a tarlang bawk.

SRH-ah mi 11-in Ventilator hmang
Nimin tlai dar 5 dinhmun angin, State Referral Hospital (ZMC)-ah Covid-19 vei mi 214 enkawl mek an ni a, mi 31 chu ICU-ah enkawl mek niin, chu'ng zinga mi 11 chu ventilator hmantir an ni. SRH-ZMC Bulletin tarlan danin, ward hrang hrangah hripui vei mi 183 enkawl an ni a, chu'ng zinga mi 82 chu oxygen pek mek an ni. Nimin khan hripui vei dah luh thar leh chhuahtir mi 19 ve ve an awm a ni.