RT-PCR dah theihna tur laboratory Lungleia din turin hmalak ṭan a ni - Health Minister

Health minister Dr R Lalthangliana chuan, Civil Hospital, Lunglei compound-ah laboratory building changtlung zawk, RT-PCR kháwl dah tel theihna tur sa turin hmalak ṭan a nih thu a sawi.

Nimina Secretariat conference hall-a contact tracing chung­chang sawihonaah Health Minister chuan, "Lung­leiah laboratory chang­tlung tak, chhim lam district palite'n ṭangkai taka an hman theih tur sak tumin sorkarin cheng nuai 781 man DPR a siam a, CM-in DO letter nen NEC leh DoNER ministry-ah a ûm zui bakah, kei pawhin ka chhu zui reng a ni," a ti.

Dr R Lalthangliana chuan, laboratory sakna tur chu hmuh hun tur hriat theih a ni rih lo tih a sawi rualin, Mizoram sorkarin a in tur sak hna ṭan nghal turin ruahmanna a siam tawh tih a sawi a, "Laboratory building sakna tur hmunhma leh a sak dan tur drawing ruahman sa vek a ni tawh," a ti a; laboratory changtlung tak a awm chuan natna hmuh chhuah hma kawnga chhim lamin harsatna tam tak an tawh chu sutkian a nih tur thu a sawi.

Mizoramah state dang nena khaikhina Covid-19 positive hmuh chhuah zat percentage a tlakhniam chak loh chhan chu positive sûlhnu chhui ngawrh leh chipchiar taka kalpui a nih vang leh test ngaite endik zel a nih vang niin meeting-ah hian an tarlang a; India ram hmun dangah Mizoram anga uluk leh chipchiara sûlhnu chhuina kalpui an awm tawh meuh lo niin an tarlang bawk.

Ṭhutkhawmah hian hripui veite sûlhnu chhui kalpui dan leh hmalak zel dan tur sawiho a ni a, rawtna thar eng emaw zat siam niin, chu'ngte chu sorkar thuneitute'n an bawhzui dawn a ni.