Covid-19 vanga inrenchemna kalpui zingah MR leh contract dah ngheh phal lohna paih
Mizoram sorkar chuan Covid-19 avangin sum leh paia inrenchemna (austerity measure) chi hrang hrang a ruahman a; inrenchemna atana tih loh tura a ruahman hrang hrang zinga pakhat, muster roll (MR) employee leh contract-a thawkte dah ngheh phal loh tih chu thlahdul a ni thung.
Finance department chuan May 28, 2020 khan office memorandum a tichhuak a; May 22, 2020-a Council of Minister ṭhukhawm thu angin, Covid-19 avanga economy tlachhe tur vènna atan austerity measure atana tih loh tur hrang hrangte a tarlang. Chu'ng zingah chuan 'MR leh contract-a thawkte dah ngheh rih loh tur' tih a tel.
Hetih lai hian, Finance department chuan nimin khan office memorandum a tichhuak a; MR leh contract employee-te dah ngheh rih loh tura tihna, 'Regularizations of muster roll/ provisional employees and contract employees shall be subject to the following conditions: put on hold' tih chu thlahdul a nih thu a tarlang.
MR leh contract-a thawkte dah ngheh rih loh tura tihna thlahdul a nih dan chu - Regularization Schemes hnuaia tarlante an zawm famkimin leh service kum 10 emaw, a aia tlem emaw an neihin a ni.
May 28, 2020-a austerity measure atana kalpui tur hrang hrangte chu thu dang a awm hma chuan kalpui tura tih a ni. Hetih lai hian, a tam zawk chu kum 2020-21 budget nghawng thil a ni a, kum 2021-22 budget hman hnuah ruahmanna thar tihchhuah a la ni lo.
