Vaccine la turin swab test a ngai lo

Health & Family Welfare (HFW) department chuan, Covid-19 vaccine lâk hmain hripui vei leh vei loh endik hmasak kher a ngai lo tih a tarlang.

HFW department chuan, Covid-19 vaccine la turin kum 18-44 inkar tan CoWin-ah inziah luh hmasak a ngaih thu tarlangin, "In register thiam/thei lote tan khaw tina common service centre (CSC)-te puihna a lak theih a, Mizoram Covid-19 helpline number 102 (toll free), phone 0389 - 2322336, 2323336, 2318336-ahte zawh theih a nih bakah, vaccine lakna hmuna thawktute puihnain tih theih a ni," a ti.

Health department tarlan danin, Covid vaccine second dose chu first dose lak aṭanga chawlhkar 12-16 (ni 84-112) inkara lâk tur a ni a, lâk hun tur chu mahnia inchhût a ngaih bakah, thuneitute ruahmanna siam ngaihven a pawimawh.

First dose leh second dose inkar hi tihtawi theih a ni a, India ram páwna zirlai, an zirna hmun pan hun tawh te, India ram páwna hnathawk, an thawhna hmun pan ṭul tawhte leh infiam mi leh a khaihhnawih, Tokyo Olympic Games-a telte tan chauh a ni thung.

Covid vaccine second dose lâk hun tihtawi theihte hian DC/CMO aṭangin vaccine second dose lak phalna an neih a ngai a, chumi tur chuan first dose an lâk aṭangin ni 28 a ral tawh tih finfiahna (Covid vaccine first dose provisional certificate) a ngai.

Zirlai tan an zirna hmun pan tura kohna emaw admission hmuhna emaw lehkhate, hnathawk tur tan interview tura kohna emaw hna zawm tura kohna lehkha leh infiam mi tan Tokyo Olympic Games-a tel tura kohna lehkha neih a ngai bawk.

Health department tarlan ṭhenkhat
• Covid-19 vei tawhte chu an dam aṭanga thla thum hnuah vaccine pek theih a ni.
• First dose la tawhin Covid-19 a vei chuan, a dam aṭanga thla thum hnuah second dose a la thei.
• Nu, nau hnute pe lai tan Covid-19 vaccine lâk phal a ni tawh.
• Vaccine lakna atana hman theih identity card chi sarih zinga mi nei mumal lote vaccine pek theih dan tur ruahman a ni.
• Vaccination drive-ah kum lama upa te, pianphunga rualbanlote leh rilru lama harsatna lian tham nei te, chenna tur nei lo emaw mahni chenna in chhuahsana vak rawlaite chu duhsak bik tur a ni.
• Ministry of HFW tarlan danin, Covid vaccine lak hmain Covid-19 vei leh vei loh endik kher a ngai lo.
• Dam lohna khirh zual emaw, ICU-a awm ngaite emaw chu an dam aṭanga chawlhkar li ral hnuah vaccine pek theih a ni.