Ruihhlo do chungchang sawiho

Nimin khan chief secretary Lalnunmawia Chuaungo kaihhruaiin CS Conference Room-ah Mizorama ruihhlo khuahkhirhna leh dona chungchang sawiho a ni a; a kaihhnawih sorkar department hotute leh Central YMA hruaitute an tel.

Ṭhutkhawmah hian, ruihhlo khuahkhirhna dan kengkawhtute leh anmahni puitu tlawmngai pawlte'n ruihhlo an do dan te, khauh zawka ruihhlo khawihtute hrem theih dan turte sawiho a ni a; harsatna chinfel dan tur ruahmanna siamin, a ṭul anga zirhona buatsaih ṭhin ni se, an ti.

Chief Secretary chuan, ruihhlo khawihtute'n an phû tâwk hremna an hmu ṭhin lo tih sawiin, "Hei hi a chhan tam tak a awm thei. Man chhuah an nih laia dan kengkawhtute thil tih dik tawk loh vang te, Court lama rorelna khawihtute tihsual palh vang te, jail enkawltute lam aṭanga felhlel vangte leh chhan dang vang a ni thei," a ti a; ruihhlo donaah ṭhahnemngai taka thawk a, tih fuh tawk loh lai a awm chuan siamṭhaa hma la turin kalkhawmte a chah.

Ṭhutkhawmah hian Excise & Narcotics secretary KT Beicho, Law & Judicial secretary Helen Dawngliani, Excise & Narcotics commissioner Ngurchungnunga Sailo, DIG (CID) Neihchungnunga, Special Court (NDPS) additional public prosecutor Lalremthangi, officer dangte leh Central YMA Vigilance Sub-Committee hruaitute an tel a ni.