Company-in ṭanpuina an pe

Delhi-a company pathumin CSR hnuaia Covid-19 dona leh hripui veite enkawlna atana hmanraw chi hrang hrang, Rs. 40,86,388 hû an pek chu nimin khan Serchhip DC Kumar Abhishek-a'n Serchhipa Health department hnenah a hlân. Ṭanpuina petute chu - Alumni of Institute for Providing Care and Relief (AIR) Foundation, JAI Foundation leh ACT Grants and Swasth Alliance-te an ni.

ACT Grants leh Swasth Alliance, New Delhi hian Rs. 20,16,000 man oxygen concentrator 18 chu Siaha district-a hman turin Bawrhsap hnenah an pe bawk a; chu'ngte chu bawrhsap Kesavan R-a'n Siaha District Hospital leh district chhunga damdawi-in (PHC) pali-ah a hlan dawn a ni.