KHAWTHLIR

Thisen pe

Nimin khan Aizawl Civil Hospital blood bank-ah Blessino Nursing School-in thisen unit 22 an pe a, petute hmeichhia 15 leh mipa pasarih an ni. Aizawla NSS programme officer-te pawhin thisen unit 13 an pe bawk. Nimin vek khan Evangelica Church of Maraland (ECM) KTP, Gosen Branch, Siaha pawhin District Hospital tan thisen unit 11 an pe a, petute mipa pakua leh hmeichhia pahnih an ni.

CM leh AR DG
Chief minister Zoramthanga leh Assam Rifles hotu lu ber director general Lt.Gen. Pradeep Chandran Nair-te chu nimin khan CMO-ah an inkâwm a, Mizorama Assam Rifles hmalakna te, thawhhona ṭha neih zel ṭha an tih thute an sawi dun. AR DG hi inspector general Maj.Gen. Ranjit Singh leh 23 Sector DIG Brig. Digvijay Singh ten an ṭawiawm a ni.

Vawk 42 suat
AH & Vety department hmalaknain ALCOF Farm, Sateekah nimin khan vawk pûl hri, African Swine Fever (ASF) léng avangin vawk suat (cull) a ni a, vawk 42 tihhluma phûm a ni.

Lawmpuina hlan
South Tuipui bialtu MLA Dr R Lalthangliana, minister chuan kumin HSLC-a a bial chhunga zirlai pass-te chu nimin khan lawmpuina a hlan a, Mizoram puma pariatna Jonathan Lalhruaitluanga, Hnahthial Chanmari leh pian tirh aṭanga kal theilo Lalramsanga, South Chawngtui-te hnenah laptop a pe bawk.

Hmanrua thawn
Sialkal Range Development Council (SRDC) chuan June 17, Ningani khan Saitual Hospital, Mimbung PHC leh Lengteng biala Mimbung, Teikhang, Hrianghmun leh Kawlkulha VTF leh YMA-te hnenah Covid-19 dona hmanraw chi hrang hrang an thawn chhuak a, SRDC chairman L Thangmawia, MLA-in SRDC office, Venghlui aṭangin a vailiam.