HSSLC 2021-ah lawmthu sawi

School Education minister Lalchhandama Ralte chuan, Higher Secondary School Leaving Certificate (HSSLC) Examination 2021 result tihchhuah a ni ta chu lawmawm a tih thu leh thawktute thawhrimna chhuanawm a tih thu a sawi.

Lalchhandama Ralte chuan, HSSLC result tihchhuah a nih theih chhan chu MBSE-a thawktu zawng zawngte leh zirtirtute thawhrimna bakah, State Executive Committee, mipui leh VTF/LTF-te ṭawiawmna leh thawhpuina rah a nih thu a sawi a ni.

Education Minister chuan, "Hlawhtlinna chang te, nu leh pa leh an zirtirtute ka lawmpui tak zet a, hlawhtling ve ta rih lote pawh rilru tihnual mai loa taimakna leh tumruhna thar nen hma lam pan turin ka duh che u a ni," a ti.

Education Minister chuan fail vekna sikul chu insawi-fiahtir turin School Education Director a hriattir a ni.