Mizoramah Delta Variant hmu

Covid-19 state nodal officer Dr Pachuau Lalmalsawma chuan, Mizoramah Covid-19 hri chhuak thar Delta Variant B.1.617.2 vei mi pali hmuh a ni tawh tih a sawi.

National Centre for Disease Control, Delhi chuan nimin khan Dr Pachuau Lalmalsawma hnenah hian Mizorama Covid-19 Delta Variant B.1.617.2 vei an awm tawh thu hi a rawn hriattir a; chu'ngte chu mipa vek niin, kum 18-45 inkar an ni.

Covid-19 thupuangtu tarlan danin, ZMC-a Department of Micro-biology chuan Mizorama Covid-19 léng mekah variant dang vei an awm leh awm loh hriat nan Covid-19 veite sample chu National Institute of Biomedical Genomics (NIBMG), Kalyani, West Bengal-ah whole genome sequencing turin an thawn a; tun hnaia sample thawn zinga pali-ah B.1.617.2 (Delta Strain) variant hmuh a ni.

SARS-CoV-2 Delta variant strain hi December 2020 khan India ramah hmuh a ni a, strain dangte aiin a danglam hle. Mithiamte chhût danin, strain dangte aiin 50%-in inkài chhàwn a awl zawk a, strain dang veite aiin a let thum (2.61) velin damdawi-ina awm ngai an tam a ni.