MBSE Chairman-in pass-te a lawmpui HSSLC exam laiin zirlai hripui vei 1 hmu
Mizoram Board of School Education (MBSE) chairman JH Zoremthanga chuan, Higher Secondary School Leaving Certificate (HSSLC) Examination 2021-a pass-te a lawmpui thu leh exam chhungin Covid-19 vei zirlai pakhat hmuh chhuah a nih thu a sawi.
JH Zoremthanga hian nimin khan thuthar thehdarhtute'n an kawmnaah, Pathian hruaina leh kohhran hote ṭawngṭaina avangin ruahman lâwk angin HSSLC result puan a nih thu a sawi a, "School Education minister Pu Lalchhandama Ralte kaihhruaina, uapna leh remruatna hnuaiah exam kan zo thei a, result kan chhuah thei ta bawk hi a lawmawm hle a ni," a ti.
MBSE Chairman chuan, exam laia Covid-19 vei hmuh chhuah, exam chhunzawm thei lo chu compartmental exam rualin a exam zawh theih loh subject-te exam chhunzawm tir a ni dawn tih a sawi.
Zirtirtute'n Covid-19 léng karah theihtawp chhuahin question setting, evaluation, invigilation, scrutiny leh tabulation-ahte an tih tur felfai taka an hlen thu sawiin Zoremthanga chuan, "An inpekna avang chauha result hi chhuah thei kan ni. Centre superintendent leh invigilator-te'n Covid-19 inkaihhruaina khauh taka an kenkawh avangin naupangah hri inkai darh a awm lo a, entawn hnawhchhuah ngai an awm lo," a ti.
MBSE Chairman chuan, Mizoram sorkar, SEC, School Education department, HSSLC zirtirtu te, HISSLAM, MISA, LTF/VTF, MISSTA leh MBSE thawktu zawng zawngte thawhhona a ṭhat avangin tluang taka result tihchhuah a nih thu te, zirlaite'n ṭhahnemngai taka an zir avangin result ṭha an neih thu te, pass lote chu ṭhahnemngai taka zir chhunzawm tura a duh thute a sawi bawk.
MBSE Chairman sawi ṭhenkhat
* HSSLC syllabus/course 30%-in tihtlem a ni
* MBSE-in model question leh week-wise plan a siam
* Online class bakah Youtube, DDK leh video clip hmangin zirlaite zirtir an ni
* CBSE, CISCE leh state dang board-te'n exam an neih theih loh laia ṭha taka kan exam thei hi Pathian hruaina leh Mizoram sorkarin zirlaite hmakhua a ngaih vang a ni
* Kum 2021-22 HSLC leh HSSLC zirlaite tan weekwise plan siam a ni tawh
* Rualkhai zawka online class kalpui a nih theih nan sorkarin hma a la mek
* HSLC & HSSLC zirlaibute district tinah a thleng kim tawh a, lei theihin a awm