Sikulte'n inelna thianghlim an neihna turin Education dept.-in ruahmanna a siam mek - Education Minister

MZP chuan June 17, Ningani zan khan Ignite Studio-ah HSLC 2021-a top 10-a langte an chawimawi a; khuallian School Education minister Lalchhandama Ralte chuan, "Sikulte'n inelna thianghlim leh quality zawk an neih theih nan accreditation council siama school grading pea kalpui tumin ruahmanna siam mek a ni," a ti.

School Education Minister chuan, Covid-19 avangin zirna tluang pangngai kalpui theih a ni lo tih sawiin, "Zirna pangngai kalpui theih hun tur a hriat loh avangin online class hmangin kawng hrang hrangin hmalak a ni," a ti a; online class leh tutorial class-te chu zirlaite'n an zawm ṭhat leh ṭhat loh enpui turin nu leh pate a chah.

HSLC 2021 top 10-ah Mizo hlang an nih ṭuma chawimawi inkhawma khuallian a ni chu lawmawm a tih thu sawiin Lalchhandama Ralte chuan, "Covid-19 boruak karah HSLC result tichhuak thei awmchhun kan ni hi kan lawm. Tun ṭuma chawimawite hi Zoram mipui idol in nih avangin an en bik dawn che u a, in ram leh hnam hi rawn hre reng ang che u," a ti.

MZP president B Vanlaltana chuan, hripui léng karah private school eng emaw zatin kum hmasa lam aia sang zawk fee la an awm tih an hriat thu sawiin, "Covid-19 boruak chhung chuan school fee san belh tawh lo se kan duh," a ti a; MZP chuan fee an thlithlai reng dawn tih a sawi.

HSLC 2021 topper hnenah Rs. 10,000 hlan a ni a, top 10-a lang dangte hnenah Rs. 5,000 ṭheuh hlan a ni thung a; chawimawina thuziak leh lehkhabu chi hrang hrang pek an ni bawk.