PIL a luh hnu chauha hmalak hi Hriatthiam a harsa - ZLP Leader

ZPM Legislature Party (ZLP) leader Vanlalhlana chuan, RT-PCR for Chhimbial-in High Court-a public interest litigation (PIL) an thehluh hnuah chauh Lungleia laboratory din turin sorkarin hma a la chu hriatthiam harsa a tih thu a sawi.

Vanlalhlana hian nimina a bial chhung hmun hrang hrang a tlawhnaah thu sawiin, "Lunglei mipuiin an mamawh em em RT-PCR nei tura an nawr mek laia hmalakna nei duh si loin, Gauhati High Court-a PIL thehluh hnuah chauh hma an la hi hriatthiam har kan ti. PIL thehlut lo se la, hma an la lo mai ang em a tih theih a ni," a ti.

ZLP Leader chuan, State Bank of India aṭanga CSR hmanga ṭanpuina sorkarin a dawn turah, hripui léng kara tuna mipui mamawh ber laboratory dinna atan hman a ni dawn loa a lan thu leh Covid-19 kaihhnawih lamah hman tum loin, ruang dahna tur in sakna atana cheng nuai 48 chuang ruahman a nih thu a sawi.

Hripui donaah tun aia chak lehzuala hma la turin sorkar a duh thu leh tlawmngaia duty task force-te thuam chak lehzual se a duh thu sawiin Vanlalhlana chuan, "Sorkar hmalakna hi mipuiin an duhkhawp lohzia chu social media hrang hrangah hmuh theihin a awm. Mipuiin thâwm an neih dan ang zela sorkarin a hmalakna a thlâk sek mai hi ruahmanna felfai a neih lohzia tilangtu a ni," a ti.