Hripui leng mimal sum siamna atan MNF sorkarin a hmang lo - MNF

MNF chuan thuchhuah siamin, Covid-19 chu MNF sorkarin mimal sum siamna atan a hmang lo nia tarlangin, ZPM Legislature Party (ZLP)-te chu thudik lo thehdarhah an puh.

ZLP-te hian NEC aṭanga sum dawna thermal camera leh ambulance pathum lei chungchangah mimal sum siam tumna awm angin dik lo takin MNF sorkar an puh nia tarlangin MNF chuan, "Pawi kan tiin an tizahthlak kan tihpui takzet. A hmasain ZLP-te hian lalna leh thuneihna chan zawh loh avanga dawt hmanga mipuite thluak suk sak leh, hetiang zawnga lamṭang zawn an chin ṭhin hi sim se kan duh," an ti.

MNF tarlan danin, Covid-19 thawhkhatnain Mizoram a lo thlen hma aṭangin Mizoram sorkar chuan theih ang angin remruatna a lo kalpui tawh a ni. Lengpui Airport leh sorkar hmun pawimawh bakah authorised check point-ahte a rang thei ang bera buna hman nghal a nih theih nan hmanhmawh takin thermal camera lei nan tender pawh koh a ni. Quotations hi firm pathum hnen aṭangin dawn a ni.

ZLP thuchhuahin a tarlan thermal camera pali tih chu panga - indoor thermal camera pakhat leh outdoor thermal camera pali a ni. Indoor thermal camera - Hikvision Bullet Thermal Camera - Fever Detectio-in a hmanraw kalpuite chu company rate pangngaiah chuan Rs. 900,000 nimah se, a pakhat man atan hian Rs.820,050 sen a ni zawk. Outdoor thermal camera pakhat nen a vaia sum sen chu Rs.40,86,250 a ni.

Ambulance chungchang sawifiahin MNF chuan, "NEC hnuai aṭang hian Tata Winger Ambulance pathum lei a ni a, pakhat man chu Rs.15,52,500 a ni a, pathum leina atan hian Rs. 46,57,500 sen a ni," an ti.

MNF chuan ram pumpuia BS4 tihtawp a nih lai, BS6 hman ṭantirh laia lei a nih thu tarlangin, "Motor hi an lian ṭhain Covid patient dinhmun ṭha vak lo thlenga phur thei tur, thuam phuisui theih tur leh Basic Life Support/ Advanced Life Support dah a ngaih pawha leng thei tura ngaih an ni," an ti a, State Level Task Force kaltlanga proper procedure felfai tak nena lei vek a nih thu an tarlang.

Hri leng dona kawngah Zoramthanga kaihhruai MNF sorkarin Pathian rawn chung zelin mipuite himna turin theihtawp a chhuah nia tarlangin, "ZLP-te'n dawt thu puarpawleng hmanga mipui bumna an la chhakchhuak duh cheu hi kan dem takzet. Hrileng hi mahni sahmim tihpuarna hun remchang atana lo hman a malsawm lo tih hi Pathian leh Kan Ram Tan titu MNF sorkar hian a theihnghilh lo tih lo hre tawh rawh se," an ti.