District tinah RT-PCR laboratory dah tura hma la turin sorkar phût

Mizoram Pradesh Congress Committee (MPCC) chuan, Mizoram sorkar chu district tinah RT-PCR laboratory dah tura hma la turin an phût.

MPCC chuan thuchhuah siamin, Ministry of Home Affairs-in March 23, 2021-a order a tihchhuahah 'Guidelines for effective control of COVID-19' a siam tih an tarlang a, "Chutah chuan RT-PCR test zat nasa taka tihsan a ngai tih tarlangin, sample test zawng zawng aṭanga 70% chung lam RT-PCR hmanga test a ni tur a ni. State leh UT sorkarte'n RT-PCR hmanga an test theih zat nasa takin an tipung tur a ni a ti," an ti a; Mizorama swab test tihna atana hman tam ber RAT chu 50% vel chiah a dik thu an tarlang.

June 17, 2021 thlenga Mizorama swab sample endik 4,42,020 zingah RT-PCR hmanga endik chu 1,56,101 (35.31%) chauh a nih thu sawiin MPCC chuan, "Mizorama sample kan test zawng zawng aṭanga 57% chu RAT hmanga test a ni. MHA guidelines-in 70% tal RT-PCR test tur a tih laiin, Mizoramah chuan 35.31% chauh a ni," an ti a; RT-PCR hmanga endik tlem chu inkhàrkhip chunga hripui vei an tlakhniam theih loh chhan pakhata an ngaih thu a sawi.

Congress party chuan, total lockdown puan piah lamah awmze nei zawka Covid-19 do turin RT-PCR hmangin a tam thei ang ber sample endik a ngai tih sawiin, "MNF sorkar chuan RT-PCR laboratory din belh theih loh dan ringawt a ngaihtuah thung. RT-PCR hmanga MNF sorkar politics khelh dan hi mipui hriselna atana hlauhawm tak leh mipui zah lohna dik tak a ni. MNF sorkar hian sorkar laipui thu a awih loh avanga mipui tawrhna thleng mekah hian mipui hi dem tawh suh se," an ti.

Mizorama sample test (June 17, 2021 thlengin)
RAT hmangin - 2,54,987 (57.68%)
Truenat hmangin - 30,874 (6.98%)
RT-PCR hmangin - 1,56,101 (35.31%)
Mizoram páwnah - 58
Belhkhawm - 4,42,020

(Source: COVID-19 Bulletin no. 457, Issued by- Directorate of Health Services)