Inkhuahkhirh chhunzawm dawn

Nimina Health & Family Welfare minister Dr R Lalthangliana hoa Secretariat conference hall-a sorkar hotute leh pawl hrang hrang hruaitute ṭhukhawm chuan, total lockdown kalpui mek June 21, 2021 zing dar 4-a a tàwp hunah vawi leh khata inthlahdul a him loah an ngai. Nimin khan inkaihhruaina thar tihchhuah a ni a, total lockdown hlih a ni.

Inkhàrkhip kalpui mek chungchang sawiho a ni a; Mizoram dinhmun thlirin, vawi leh khata inthlahdul vek chu a la him loah an ngai a, June 21 aṭanga mipui nunphung tur chu uluk leh fimkhur taka ruahman ṭha an ti. State Executive Committee on State Disaster Management Authority chuan nimin khan inkaihhruaina thar siamin an tichhuak nghal.

Inkaihhruaina thupek thar chuan, inkhuahkhirhna kalpuiin hripui léng ven kawngah nasa takin awmzia nei mah se, hun rei tak kalpui a nih tawh avangin ni tin ei leh bàr zawn kawngah nasa takin nunphung a tihkhaihlak tih a tarlang a, "Ei leh bàr kawnga kan dinhmun a tlakhniam lutuk loh nan eizawnna hna ngaihtuah chunga inkhuahkhirhna kalpui chhunzawm ṭha tih a ni," a ti.

Inkaihhruaina tharah hian total lockdown kalpui tura tarlan ni lo mah se, total lockdown laia inkaihhruaina nen a inang tlangpui a ni.

MIZORAM PUM INKAIHHRUAINA THAR
1. Eizawnna leh ṭul bik thil ni loa veivah leh inlènpawh khap a ni.
2. Zirna-in leh sakhaw biakna hmunte khâr chhunzawm tur a ni.
3. Mitthi vuina, inneihna leh reception-ah mi 30 aia tam pun khawm phal a ni lo.
4. Chhiatni/ṭhatni leh puipunna dangah ei leh in sem/siam phal a ni lo.
5. Public park, picnic spot, movie theatre, gym, football/futsal ground, community hall, phalna pek loh dawrte leh intàwllênna hmunte khâr chhunzawm tur.
6. Birthday leh anniversary lawm, games & sport, lehkhabu tlangzarh, lungphun leh intihhlimnate huaihawt phal a ni lo.
7. Chhiat tawh, dam loh leh ṭul bik thilah LTF/VTF hriatpuina lehkha kengin zin veivah theih a ni a; AMC páwn lamah inkhuahkhirhna a awm lo.
8. Eizawnna kaihhnawih ni lo, a huhoa lui kal, ramhnuaia picnic, hiking leh adventure sport tih phal a ni lo.

AMC CHHUNG BIKAH
1. Office kal tur leh phalna neite bak chu mahni in/compound chhuahsan phal a ni lo a, building khata in hrang hrang luahte intlawhpawh loh tur.
2. Phalna bik nei lote tan lirtheia veivah khap a ni.
3. District Magistrate-in zan curfew 7:00 p.m. - 4:00 a.m. a puang ang.
4. Chhuah phal lohin a huam lohte chu a hmaa mi ang a ni tlangpui.
5. Mizoram sorkar pisa kai turte hotute'n hming hmerhin an ruat ang.
6. Eichawp dawrte ni tin zing dar 5-8 inkarah hawn phal a ni.
7. Thlai leh sa zawrhnate Zirtawpni-ah zing dar 5 - tlai 5 inkarah hawn theih a ni.
8. Zing dar 5 - tlai dar 5 inkara dawr hawn dan tur tarlan a ni a, tarlan lohte chu DC leh LTF-te'n Group A leh B-ah ṭhenin inhawn chhawk tur a ni.
9. Dawr hawn dan tur:
a) Thlai chi/ṭiak leh agriculture/horticulture kaihhnawih zawrhna - ni tin
b) Zirlaibu zawrhna dawr - Thawhlehni
c) Motor oil, spare part zawrhna leh workshop/puncture work - Thawhlehni
d) Group A dawrte - Thawhlehni
e) Group B dawrte - Zirtawpni
f) Computer leh mobile zawrhna leh siamna - Zirtawpni
g) Iron rod, balu, rawra, lung, leirawhchan, cement, electric bungrua, in sakna bungrua, etc. - Zirtawpni